Gold- Silver Rates | మధ్యప్రాచ్యంలో ఉద్రిక్తతల నేపథ్యంలో గ్లోబల్ మార్కెట్లలో బంగారం, వెండి ధరలు తిరిగి పుంజుకున్నాయి. ఫలితంగా దేశీయ బులియన్ మార్కెట్లో మూడు రోజుల పతనం తర్వాత సోమవారం బంగారం, వెండి ధరలు పెరిగాయి. దేశ రాజధాని ఢిల్లీలో తులం బంగారం (24 క్యారట్స్) ధర రూ.220 పెరిగి రూ.72,820 వద్ద స్థిర పడింది. శుక్రవారం తులం బంగారం ధర రూ.72,600 వద్ద ముగిసిందని హెచ్డీఎఫ్సీ సెక్యూరిటీస్ తెలిపింది. మరోవైపు కిలో వెండి ధర సోమవారం రూ.1050 పెరిగి రూ.92,850 వద్ద ముగిసింది. శుక్రవారం సెషన్ లో కిలో వెండి ధర రూ.91,800 వద్ద స్థిర పడింది.
ఢిల్లీలో స్పాట్ గోల్డ్ తులం (24 క్యారట్స్) ధర రూ.220 లబ్ధితో రూ.72,820 వద్ద ట్రేడయిందని హెచ్డీఎఫ్సీ సెక్యూరిటీస్ కమోడిటీస్ సీనియర్ అనలిస్ట్ సౌమిల్ గాంధీ తెలిపారు. అంతర్జాతీయ మార్కెట్లలో సోమవారం స్పాట్ గోల్డ్ ఔన్స్ ధర తొమ్మిది డాలర్ల లబ్ధితో 2344 డాలర్ల వద్ద ట్రేడయింది. యూఎస్ డాలర్ సానుకూలంగా మారడంతోపాటు రఫాపై ఇజ్రాయెల్ వైమానిక దాడుల నేపథ్యంలో ఇన్వెస్టర్ల నుంచి బంగారానికి డిమాండ్ పెరిగిందని సౌమిల్ గాంధీ వివరించారు. ఔన్స్ వెండి ధర 30.75 డాలర్లు పలికింది.
మరోవైపు దేశీయంగా మల్టీ కమోడిటీ ఎక్స్చేంజ్ (ఎంసీఎక్స్)లో జూన్ కాంట్రాక్ట్ ధర తులం బంగారం ఇంట్రాడే ట్రేడింగ్ లో రూ.71,748లతో గరిష్టాన్ని తాకి చివరకు రూ.462 పెరుగుదలతో రూ.71,718 వద్ద ముగిసింది. మరోవైపు కిలో వెండి జూలై కాంట్రాక్ట్ ధర రూ.1527 లబ్ధితో రూ.92,075 వద్ద స్థిర పడింది.