Gold-Silver Rates | వరుసగా మూడు సెషన్లలో తగ్గిన బంగారం, వెండి ధరలు శుక్రవారం తిరిగి పుంజుకున్నాయి. గ్లోబల్ మార్కెట్లలో డిమాండ్ పెరగడంతో దేశీయ బులియన్ మార్కె్ట్లో శుక్రవారం తులం బంగారం ధర (24 క్యారట్స్) స్వల్పంగా రూ.50 పెరిగి రూ.70,700లకు పెరిగింది. గురువారం బంగారం ధర రూ.70,650 పలికింది. ఆల్ ఇండియా సరఫా అసోసియేషన్ తెలిపిన వివరాల ప్రకారం 99.9 శాతం స్వచ్ఛత గల బంగారం తులం ధర రూ.50 పెరిగి రూ.70,700, 99.5 శాతం స్వచ్ఛత గల బంగారం తులం ధర రూ.70,350 వద్ద స్థిర పడింది. మరోవైపు కిలో వెండి ధర సైతం రూ.400 వృద్ధి చెంది రూ.84,400లకు చేరుకున్నది. గురువారం కిలో వెండి ధర రూ.84 వేల వద్ద స్థిర పడింది. గ్లోబల్ మార్కెట్లతోపాటు దేశీయంగా కూడా ఆభరణాల కొనుగోళ్ల గిరాకీ పెరగడంతో కూడా బంగారం ధర వృద్ధికి కారణమైందని విశ్లేషకులు చెబుతున్నారు.
ఈ నెల 23న ప్రస్తుత ఆర్థిక సంవత్సరం (2024-25) బడ్జెట్ సమర్పిస్తూ కేంద్ర ఆర్థిక మంత్రి నిర్మలా సీతారామన్.. బంగారం, వెండిలపై బేసిక్ కస్టమ్స్ డ్యూటీ ఆరు శాతానికి కుదించడంతో మంగళవారం ఒక్కరోజే తులం బంగారం ధర రూ.3350 తగ్గి రూ.72,300లకు పడిపోగా, కిలో వెండి ధర రూ.3500 క్షీణించి రూ.87,500 వద్ద స్థిర పడింది. బుధవారం తులం బంగారం ధర రూ.500, గురువారం రూ.1000 తగ్గింది. మూడు రోజుల్లో తులం బంగారం ధర రూ.5000 తగ్గడంతో బంగారం కొనుగోలు దారులతో జ్యువెల్లరీ ఆభరణాల దుకాణాల్లో సందడి నెలకొంది.
అంతర్జాతీయ మార్కెట్లో ఔన్స్ బంగారం ధర 2416.40 డాలర్ల నుంచి 2350 డాలర్లకు పతనమైంది. ఔన్స్ వెండి ధర న్యూయార్క్ లో 27.89 డాలర్లు పలికింది. కీలక వడ్డీరేట్లపై వచ్చే వారం యూఎస్ ఫెడ్ రిజర్వు సమావేశం కీలకం కానున్నది. యూఎస్ ద్రవ్యోల్బణం గణాంకాల కోసం ఇన్వెస్టర్లు ఎదురు చూస్తున్నారు.