Gold Rate | న్యూఢిల్లీ, జూలై 16: బంగారం ధరలు పరుగులు పెడుతూనే ఉన్నాయి. మంగళవారం ఒక్కరోజే 24 క్యారెట్ (99.9 స్వచ్ఛత) 10 గ్రాముల పుత్తడి రేటు రూ.550 ఎగిసింది. దీంతో దేశ రాజధాని నగరం న్యూఢిల్లీలో తులం రూ.75,700 పలికింది. 22 క్యారెట్ (99.5 స్వచ్ఛత) బంగారం రూ.75,350గా ఉన్నది. అంతర్జాతీయ మార్కెట్లలో పెరిగిన డిమాండ్, దేశీయంగా నగల వర్తకుల నుంచి ఊపందుకున్న కొనుగోళ్లు.. పసిడి విలువను పైపైకి తీసుకెళ్తున్నాయి. ఈ క్రమంలోనే వరుసగా ఐదోరోజూ రేట్లు పెరిగాయి. గత 5 సెషన్లలో 1,300 పెరగడం గమనార్హం. కాగా, అఖిల భారత సరఫా అసోసియేషన్ వివరాల ప్రకారం సోమవారం ఢిల్లీలో 99.9 స్వచ్ఛత కలిగిన గోల్డ్ ధర 10 గ్రాములు రూ.75,150 వద్ద ఉన్నది.
ఢిల్లీతో పోల్చితే హైదరాబాద్లో బంగారం ధరలు తక్కువగా ఉన్నాయి. 10 గ్రాముల 24 క్యారెట్ పుత్తడి రేటు రూ.74,020గా ఉన్నది. సోమవారం ముగింపుతో చూస్తే రూ.380 పెరిగింది. అలాగే 22 క్యారెట్ ధర రూ.350 పెరిగి రూ.67,850గా నమోదైంది. నిజానికి ఇక్కడ 2-3 రోజుల నుంచి ధరలు తగ్గడమో లేదా యథాతథంగానే ఉన్నాయి. అయితే మార్కెట్ కదలికలు తిరిగి చురుకుదనాన్ని అందుకోవడంతో రేట్లు విజృంభించాయని ట్రేడింగ్ నిపుణులు విశ్లేషిస్తున్నారు. మరోవైపు ఫ్యూచర్ మార్కెట్లోనూ గోల్డ్ ధర రూ.172 పెరిగి రూ.73,643కు చేరింది. ఆగస్టు డెలివరీకిగాను మల్టీ కమోడిటీ ఎక్సేంజ్లోని గోల్డ్ కాంట్రాక్టుల్లో ఈ రేట్లు నమోదయ్యాయి.
బంగారం ధరలతోపాటు వెండి రేట్లూ పుంజుకున్నాయి. ఢిల్లీలో కిలో విలువ రూ.400 అందుకుని రూ.94,400గా ఉన్నది. హైదరాబాద్లో రూ.95,000గా నమోదైంది. ఈ నెల 11న కిలో రూ.1,000 పెరిగింది. మళ్లీ ఆ తర్వాత ఇప్పుడే రేటు పెరగడం గమనార్హం. 4-5 రోజులుగా మార్కెట్లో నెలకొన్న స్తబ్ధత వీడిందని, ఇన్వెస్టర్లతోపాటు సాధారణ కొనుగోలుదారులు, పరిశ్రమల నుంచి వస్తున్న డిమాండే ఇందుకు కారణమని వ్యాపారులు చెప్తున్నారు. అయితే అమెరికా ఫెడరల్ రిజర్వ్ బ్యాంక్.. వడ్డీరేట్లను వీలైతే కొంతమేర తగ్గించడానికి సుముఖంగానే ఉన్నట్టు సంకేతాలిచ్చిన నేపథ్యంలో ధరలు పెరగడం ప్రాధాన్యాన్ని సంతరించుకున్నది. ఇక ట్రెజరీ ఈల్డ్స్లో క్షీణత, అమెరికా డాలర్ సూచీలో పతనం కూడా గోల్డ్ మార్కెట్ను ఇన్వెస్టర్లకు ఆకర్షణీయం చేసిందని, అందుకే రేట్లు పెరిగాయని మార్కెట్ వర్గాలు పేర్కొంటున్నాయి. కాగా, గ్లోబల్ మార్కెట్లో ఔన్సు బంగారం 2,461 డాలర్లు పలికింది. వెండి 31.29 డాలర్లుగా ఉన్నది.
విదేశాలకు భారత్ నుంచి రత్నాలు, ఆభరణాల ఎగుమతులు తగ్గుముఖం పట్టాయి. నిరుడుతో పోల్చితే గత నెల జూన్లో 13.44 శాతం క్షీణత నమోదైంది. మొత్తంగా ఎగుమతుల విలువ రూ.15,939.77 కోట్లు (1,909.57 మిలియన్ డాలర్లు)గానే ఉన్నట్టు రత్నాలు, ఆభరణాల ఎగుమతుల ప్రోత్సాహక మండలి (జీజేఈపీసీ) తాజా గణాంకాలు చెప్తున్నాయి. గత ఏడాది జూన్లో ఇవి రూ.18,413.88 కోట్లు (2,240.77 మిలియన్ డాలర్లు)గా ఉన్నాయి. అంతర్జాతీయ మార్కెట్లో చాలాకాలం నుంచి కొనసాగుతున్న భౌగోళిక, రాజకీయ ఉద్రిక్తతలు మార్కెట్ను దెబ్బతీస్తున్నట్టు జీజేఈపీసీ చైర్మన్, కామా జ్యుయెల్లరీ ఎండీ కొలిన్ షా తెలిపారు. కాగా, సానబెట్టిన వజ్రాల ఎగుమతులు గత నెల 25.17 శాతం పడిపోయి రూ.8,496.87 కోట్లుగా ఉన్నాయి. మునుపు రూ.11,354.67 కోట్లు. చైనా నుంచి ఆశించిన స్థాయిలో డిమాండ్ లేకపోవడమే కారణమని ఎగుమతిదారులు పేర్కొంటున్నారు. దేశీయ ఎగుమతుల్లో దాదాపు మూడింటా ఒక వంతు చైనాకే జరుగుతున్నాయి. అయితే కేవలం బంగారు నగల ఎగుమతుల విషయానికే వస్తే.. వృద్ధి కనిపిస్తున్నది. నిరుడు జూన్ కంటే 7.97 శాతం పెరిగి రూ.5,074.27 కోట్లుగా ఉన్నాయి.