న్యూఢిల్లీ, మే 31: దేశ జీడీపీ గణాంకాలు ఈ జనవరి-మార్చి త్రైమాసికంలో నిరాశపర్చాయి. అంతకుముందు త్రైమాసికం అక్టోబర్-డిసెంబర్లో 8.6 శాతంగా ఉంటే.. ఈసారి మాత్రం 7.8 శాతానికే పరిమితమయ్యాయి. జూలై-సెప్టెంబర్లో 8.1 శాతంగా, ఏప్రిల్-జూన్లో 8.2 శాతంగా ఉండటంతో.. గత ఆర్థిక సంవత్సరం (2023-24) మొత్తం 4 త్రైమాసికాల్లో చివరి త్రైమాసికంలోనే 8 శాతం దిగువన వృద్ధి నమోదైనైట్టెంది. ఈ మేరకు జాతీయ గణాంకాల కార్యాలయం శుక్రవారం తెలియజేసింది. గత ఆర్థిక సంవత్సరం జీడీపీ 8.2 శాతంగా ఉన్నది. అంతకుముందు 2022-23లో ఇది 7 శాతం..
దేశంలో ఎంతోమందికి జీవనాధారంగా ఉన్న వ్యవసాయ రంగం దిగాలు పడింది. జనవరి-మార్చిలో వ్యవసాయ రంగ వృద్ధి 0.6 శాతం పడిపోయింది. గతంలో ఇది 7.6 శాతంగా ఉండటం గమనార్హం. దీంతో కేంద్ర ప్రభుత్వ విధానాలే ఇందుకు కారణమన్న విమర్శలు ఇప్పుడు వ్యక్తమవుతున్నాయి. మోదీ సర్కారు వ్యవసాయ రంగానికి తగినంత ప్రాధాన్యతనివ్వడం లేదని వ్యవసాయ, దాని ఆధారిత పరిశ్రమ వర్గాలు ఒకింత అసహనం వెలిబుచ్చుతున్నాయి.
గత ఆర్థిక సంవత్సరం (2023-24) కేంద్ర ప్రభుత్వ ద్రవ్యలోటు.. దేశ జీడీపీలో 5.6 శాతంగా నమోదైంది. ఈ మేరకు శుక్రవారం కంట్రోలర్ జనరల్ ఆఫ్ ఇండియా (సీజీఏ) విడుదల చేసిన గణాంకాలు చెప్తున్నాయి. ప్రభుత్వ ఆదాయం కన్నా, వ్యయం ఎక్కువగా ఉన్నప్పుడు ఆ వ్యత్యాసాన్నే ద్రవ్యలోటుగా పరిగణిస్తామన్న విషయం తెలిసిందే. ఈ క్రమంలోనే ఆదాయ-వ్యయాల మధ్య తేడా రూ.16.53 లక్షల కోట్లుగా ఉన్నది. ఇది జీడీపీలో 5.63 శాతానికి సమానం. 2022-23 ఆర్థిక సంవత్సరంలో ద్రవ్యలోటు జీడీపీలో 8.2 శాతంగా ఉన్నది. కాగా, ఈసారి నికర పన్ను వసూళ్లు రూ.23.26 లక్షల కోట్లుగా ఉన్నాయి.