Zomato | ప్రముఖ ఫుడ్ డెలివరీ అగ్రిగేటర్ జొమాటో మరోమారు చిక్కుల్లో పడింది. తాజాగా జొమాటోకు ఆదాయం పన్ను విభాగం ట్యాక్స్ డిమాండ్ నోటీసు జారీ చేసింది. సర్వీస్ ట్యాక్స్, పెనాల్టీతో కలిపి రూ.184 కోట్లు చెల్లించాలని జొమాటోను ఆదాయం పన్ను విభాగం ఆదేశించింది. దీనిపై అప్పీలేట్ అథారిటీకి వెళతామని సోమవారం అర్ధరాత్రి పొద్దుపోయిన తర్వాత దాఖలు చేసిన రెగ్యులేటరీ ఫైలింగ్ లో జొమాటో తెలిపింది.
విదేశీ అనుబంధ సంస్థలు, భారత్ ఆవలి శాఖల్లో 2014 నుంచి 2017 జూన్ మధ్య జరిగిన విక్రయాలపై సర్వీస్ టాక్స్ చెల్లించలేదని ఈ నెల ఒకటో తేదీన ఢిల్లీ సెంట్రల్ ట్యాక్స్ కమిషనర్ డిమాండ్ నోటీసు పంపిందని జొమాటో తెలిపింది. ఇప్పటికే తమకు జారీ చేసిన షోకాజ్ నోటీసుపై తాము ఆధారాలతోపాటు వివరణాత్మక సమాధానం ఇచ్చామని పేర్కొంది. తాజా ఉత్తర్వులు జారీ చేసే ముందుకు తమ వివరణను అధికారులు పరిగణనలోకి తీసుకోలేదని జొమాటో వెల్లడించింది.
వడ్డీతో కలిపి సర్వీస్ టాక్స్ రూ.92 కోట్లు (రూ.92,09,90,306) ప్లస్ పెనాల్టీ (రూ.92 కోట్లు) కలిపి మొత్తం రూ.184 కోట్లు చెల్లించాలని డిమాండ్ నోటీసు అందుకున్నామని జొమాటో తెలిపింది. దీనిపై సంబంధిత అప్పీలేట్ అథారిటీకి వెళతామని, ఈ నోటీసు వల్ల తమ కంపెనీపై ఎటువంటి ప్రభావం ఉండబోదని స్పష్టం చేసింది. 2018-19 ఆర్థిక సంవత్సరానికి రూ.23.16 కోట్ల జీఎస్టీ చెల్లించాలని జొమాటోకు కర్ణాటక అధికారులు నోటీసు జారీ చేశారు. దీనిపైనా న్యాయస్థానాన్ని ఆశ్రయిస్తామని జొమాటో వివరించింది.