ముంబై, జనవరి 20: ప్రత్యేక ట్రేడింగ్లోనూ స్టాక్ మార్కెట్లు నష్టపోయాయి. ప్రారంభంలో భారీగా లాభపడ్డ సూచీలు చివర్లో మదుపరులు అమ్మకాలకు పోటెత్తడంతో శనివారం బీఎస్ఈ సెన్సెక్స్ 259.58 పాయింట్లు నష్టపోయి 71, 432.65 వద్ద ముగిసింది. 30 షేర్ల ఇండెక్స్లో 24 నష్టపోగా..కేవలం ఆరు సూచీ లు లాభాల్లో ముగిశాయి. అలాగే నిఫ్టీ 50.60 పాయింట్లు కోల్పోయి 21,571. 80 వద్ద స్థిరపడింది. మార్కెట్లో కొటక్ బ్యాంక్, పవర్గ్రిడ్, ఐసీఐసీఐ బ్యాంక్, హెచ్డీఎఫ్సీ బ్యాంక్, పవర్గ్రిడ్ షేర్లు లాభాల్లో ముగియగా..హెచ్యూఎల్, టీసీఎస్, మహీంద్రా, ఇండస్ఇండ్ బ్యాం క్, హెచ్సీఎల్ టెక్నాలజీ షేర్లు నష్టపోయాయి.
ఎఫ్ఎంసీజీ, ఐటీ రంగ షేర్లు కుప్పకూలడం వల్లనే సూచీలు నష్టపోయాయని దలాల్స్ట్రీట్ వర్గాలు వెల్లడించాయి. బ్లూచిప్ సంస్థల నిరాశాజనక ఆర్థిక ఫలితాలు పతనానికి ఆజ్యంపోశాయి. మరోవైపు, అయోధ్య రామ మందిరానికి సంబంధించిన పలు కంపెనీ షేర్లు రాకెట్ వేగంతో దూసుకుపోయాయి. ప్రస్తుత నెలలో ఇప్పటి వరకు పక్కా లిమిటెడ్ షేరు 148 శాతం లాభపడగా, కామత్ హోటల్స్ 71 శాతం, ఎస్ఐఎస్ లిమిటెడ్ 18 శాతం, ప్రవేగ్ 35 శాతం, అపోలో సిండూరీ హోటల్ 54 శాతం, థామస్కుక్ 18 శాతం, ఐఆర్సీటీసీ 17 శాతం, జెనీసిస్ 16 శాతం వరకు లాభపడ్డాయి.