Twitter – X | సోషల్ మీడియా ప్లాట్ఫామ్ ‘ట్విట్టర్’లో ‘బర్డ్ లోగో’ ఇక చరిత్రలో ఒక అధ్యాయంగా మిగిలిపోనున్నది. గతేడాది ట్విట్టర్ ను టేకోవర్ చేసుకున్నప్పటి నుంచి ఎలన్ మస్క్.. సంస్థలో పలు మార్పులు చేసిన సంగతి తెలిసిందే. తాజాగా ట్విట్టర్ ‘బర్డ్’ లోగో స్థానే ‘ఎక్స్’ లోగో తీసుకొస్తున్నట్లు ప్రకటించారు. ట్విట్టర్ డాట్ కామ్ స్థానే ఎక్స్.కామ్ లైవ్ లోకి వస్తుందని మస్క్ ట్వీట్ చేశారు. మున్ముందు ట్విట్టర్ పేరు కూడా మారనున్నట్లు తెలుస్తున్నది.
2006లో ఏర్పాటైన ట్విట్టర్ లోగోగా పక్షుల కిలకిలరావాలకు గుర్తుగా ‘బర్డ్’ లోగో ఏర్పాటు చేశారు. వెబ్ సైట్ క్రియేటివ్ బ్లాగ్ కథనం ప్రకారం లైట్ బ్లూ బర్డ్ సింబల్ కోసం 15 డాలర్లు చెల్లించి లోగో తయారు చేయించారని తెలుస్తున్నది.
గతేడాది అక్టోబర్లో ట్విట్టర్ను టేకోవర్ చేసిన ఎలన్ మస్క్.. ఎవ్రీథింగ్ యాప్ కోసం ఎక్స్ సంస్థ ఏర్పాటు చేస్తున్నట్లు తెలిపారు. 1999లోనే ఎక్స్ డాట్ కామ్ సంస్థను ఎలన్ మస్క్ స్థాపించారు. ట్విట్టర్ పేరెంట్ సంస్థగా ఎక్స్ కార్పొరేషన్ పేరు పెట్టారు ఎలన్ మస్క్.