గత త్రైమాసికంలో అన్ని విభాగాలు పటిష్టమైన ఆర్థిక, నిర్వహణ పనితీరును నమోదు చేశాయి. పన్నులు చెల్లించకముందు లక్ష కోట్ల లాభాన్ని ఆర్జించిన తొలి సంస్థ రిలయన్స్ కావడం విశేషం. డిజిటల్ రంగం బూస్ట్నిచ్చింది.
Reliance | న్యూఢిల్లీ, ఏప్రిల్ 22: దేశీయ వ్యాపార దిగ్గజం రిలయన్స్ ఇండస్ట్రీస్ నిరాశాజనక ఆర్థిక ఫలితాలు ప్రకటించింది. గడిచిన ఆర్థిక సంవత్సరం చివరి త్రైమాసికంలో సంస్థ రూ.18,951 కోట్ల నికర లాభం లేదా ప్రతిషేరుకు రూ.28.01 ఆర్జించింది. క్రితం ఏడాది ఇదే త్రైమాసికంలో వచ్చిన రూ.19,299 కోట్లు లేదా ప్రతిషేరుకు రూ.28.52 కంటే తక్కువగా నమోదైంది. కానీ, అక్టోబర్-డిసెంబర్ త్రైమాసికంలో నమోదైన రూ.17,265 కోట్ల కంటే అధికం కావడం విశేషం. చమురు అధిక ధరల కారణంగా గత త్రైమాసికంలో సంస్థ రూ.2.64 లక్షల కోట్ల ఆదాయాన్ని గడించింది. గతేడాది కంటే ఇది 11 శాతం అధికం. చమురు, పెట్రోకెమికల్స్ వ్యాపారాలు ఆశాజనక పనితీరు కనబరిచినప్పటికీ టెలికం, రిటైల్ రంగాలు సంస్థ లాభాలకు గండికొట్టాయి.
రిలయన్స్ మరో చరిత్రను సృష్టించింది. 2023-24 ఆర్థిక సంవత్సరం మొత్తానికి రూ.10 లక్షల కోట్ల ఆదాయాన్ని ఆర్జించింది. ఒక ఏడాదిలో ఇంతటి స్థాయిలో ఆదాయాన్ని ఆర్జించిన దేశీయ తొలి సంస్థ రిలయన్స్ కావడం విశేషం. అలాగే గతేడాదికిగాను రూ. 69,621 కోట్ల నికర లాభాన్ని గడించింది.
జియో లాభాల్లో దూసుకుపోతున్నది. గడిచిన త్రైమాసికానికిగాను సంస్థ రూ.5,337 కోట్ల ఏకీకృత నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.4,716 కోట్ల లాభంతో పోలిస్తే 13 శాతం ఎగబాకింది. అలాగే సంస్థ ఆదాయం ఏడాది ప్రాతిపదికన 11 శాతం ఎగబాకి రూ. 25,959 కోట్లుగా నమోదైంది. 2023-24 ఆర్థిక సంవత్సరానికిగాను రూ.1,00,119 కోట్ల ఆదాయంపై రూ.21,424 కోట్ల లాభాన్ని గడించింది. మరోవైపు, జియో మేనేజింగ్ డైరెక్టర్ సంజయ్ మశ్రువాలా తన పదవికి రాజీనామా చేశారు. ధీరుభాయి అంబానీ కాలం నుంచి రిలయన్స్లో కీలక వ్యక్తిగా వ్యవహరించిన మశ్రువాలా..జూన్ 9న వైదొలగనున్నారు. దీంతో పంకజ్ మోహన్ పవార్ ఎండీగా కొనసాగనున్నారు. జియో కస్టమర్లు 47 కోట్ల నుంచి 48 కోట్లకు పెరిగారు. ఒక్కో కస్టమర్పై సరాసరిగా రూ.181.7 ఆదాయాన్ని ఆర్జిస్తున్నది.