Aadhar-Ration Card Link | రేషన్ కార్డు, ఆధార్ మధ్య అనుసంధానానికి కేంద్రం మరో అవకాశం తెచ్చింది. రేషన్ కార్డు -ఆధార్ అనుసంధాన గడువు మరోమారు పొడిగిస్తున్నట్లు ప్రకటించింది. ముందుగా నిర్ణయించిన షెడ్యూల్ ప్రకారం ఈ నెలాఖరుతో ముగియాల్సి ఉంది. దాన్ని సెప్టెంబర్ 30 వరకూ పొడిగించింది. రేషన్ కార్డుల దుర్వినియోగాన్ని అడ్డుకునేందుకు వాటిని ఆధార్’తో అనుసంధానించాలని గతంలోనే కేంద్రం ఆదేశించింది. తదనుగుణంగా పలువురు తమ రేషన్ కార్డుతో ఆధార్ అనుసంధానించారు. ఆధార్-రేషన్ కార్డు అనుసంధానం వల్ల నకిలీ రేషన్ కార్డులు తగ్గడానికి ఆస్కారం ఉంటుంది. కనుక ఇప్పటికీ ఆధార్-రేషన్ కార్డు అనుసంధానించని వారు ఆ ప్రక్రియ పూర్తి చేయాలి.
ఇందుకోసం రేషన్ కార్డు దారులు సమీపంలోని రేషన్ షాపు వద్ద గానీ, కామన్ సర్వీస్ సెంటర్ సాయంతో గానీ తమ రేషన్ కార్డు-ఆధార్ లింక్ చేసుకోవచ్చు. ఆధార్, రేషన్ కార్డులతోపాటు అవసరమైన డాక్యుమెంట్లు సమర్పించి బయో మెట్రిక్ వెరిఫికేషన్ పూర్తి చేయొచ్చు. ఆన్లైన్లోనూ అనుసంధానం చేసుకోవచ్చు. అందుకోసం రాష్ట్ర పబ్లిక్ డిస్ట్రిబ్యూషన్ సిస్టమ్ (పీడీఎస్) పోర్టల్ లోకి వెళ్లి లింక్ చేయొచ్చు. రేషన్ కార్డు, ఆధార్ కార్డ్ నంబర్, రిజిస్టర్డ్ మొబైల్ ఫోన్ నంబర్ నమోదు చేసి సబ్మిట్ చేయాలి. తదుపరి మీ మొబైల్ ఫోన్ నంబర్ కి వచ్చే ఓటీపీని నమోదు చేయడంతో ఆధార్-రేషన్ కార్డు అనుసంధానం పూర్తి అవుతుంది.