Union Minister Piyush Goyal | బంగారం, వెండి దిగుమతిపై కస్టమ్స్ డ్యూటీ తగ్గింపు విషయమై కేంద్ర పరిశ్రమలు, వాణిజ్యశాఖ మంత్రి పీయూష్ గోయల్ ఆసక్తికర వ్యాఖ్యలు చేశారు. ‘బంగారం, వెండి ఆభరణాల తయారీని ప్రోత్సహించడానికే వాటి దిగుమతిపై కస్టమ్స్ సుంకం తగ్గించాం. అలాగే బంగారం స్మగ్లింగ్ నియంత్రణ కోసం కస్టమ్స్ సుంకం తగ్గించాం’ అని పీయూష్ గోయల్ మంగళవారం పీటీఐకి చెప్పారు. ఏంజిల్ టాక్స్ రద్దు వల్ల స్టార్టప్ పరిశ్రమలను మరింత బలోపేతం చేయొచ్చునన్నారు. దేశంలోని అన్ని వర్గాల ప్రజల ప్రయోజనానికి బడ్జెట్ లో కేటాయింపులు జరిగాయని పీయూష్ గోయల్ తెలిపారు. ప్రత్యక్ష విదేశీ పెట్టుబడుల (ఎఫ్డీఐ)పై కేంద్ర కార్యదర్శుల కమిటీ ముందు పలు ప్రతిపాదనలు పరిశీలనలో ఉన్నాయన్నారు. ఎఫ్డీఐలకు అనుమతి ప్రక్రియ మరింత సరళతరం చేయడమే తమ ప్రభుత్వ లక్ష్యం అని చెప్పారు. భారీగా బంగారం ధరలు పెరిగిన నేపథ్యంలో ప్రస్తుతం పెండ్లిండ్ల సీజన్లో కస్టమ్స్ సుంకం తగ్గింపు ప్రజలకు చేయూతనిస్తుందని పీయూష్ గోయల్ తెలిపారు. బంగారం, వెండి దిగుమతిపై కస్టమ్స్ సుంకం ఆరు శాతానికి తగ్గిస్తూ కేంద్ర బడ్జెట్ లో ఆర్థిక మంత్రి నిర్మలా సీతారామన్ ప్రతిపాదించిన సంగతి తెలిసిందే.