Credit Card Defaults | గతంతో పోలిస్తే ప్రస్తుతం దాదాపు ప్రతి ఒక్కరూ క్రెడిట్ కార్డు వాడుతున్నారు. సేవింగ్స్ ఖాతా నిర్వహణలో ఆర్థిక క్రమశిక్షణ పాటించే ప్రతి ఒక్కరికీ బ్యాంకులు క్రెడిట్ కార్డులు జారీ చేస్తున్నాయి. అకౌంట్లో తగినంత డబ్బు లేకున్నా.. క్రెడిట్ ఫెసిలిటీ ద్వారా తేలిగ్గా కొనుగోళ్లు చేసుకునే వెసులుబాటు, ఆయా కొనుగోళ్లపై క్యాష్ బ్యాక్ ఆఫర్లు, రివార్డు పాయింట్లు, డిస్కౌంట్ వంటి బెనిఫిట్లు ఉంటాయి. క్రెడిట్ కార్డుతో తేలిగ్గా రుణాలు తీసుకోవచ్చు. ఈ నేపథ్యంలోనే గత రెండేండ్లలో క్రెడిట్ కార్డు హోల్డర్లు తమ క్రెడిట్ లిమిట్ భారీగా పెంచుకున్నారు.
క్రెడిట్ కార్డుల వినియోగం పెరుగుతున్నట్లే.. వాటిపై బకాయిల మొత్తం గత రెండేండ్లలో నాలుగు రెట్లు పెరిగిందని ట్రూ బోర్డ్ పార్టనర్స్ అనే అధ్యయనంతో తేలింది. క్రెడిట్ కార్డుల లావాదేవీల విలువ రెండింతలు ఎక్కువైంది. సమాచార హక్కు చట్టం (ఆర్టీఐ) కింద ఓ సామాజిక కార్యకర్త దాఖలు చేసిన పిటిషన్పై స్పందించిన ఆర్బీఐ.. 2022లో క్రెడిట్ కార్డు డిఫాల్ట్లు రూ.3,122 కోట్లు ఉంటే, 2023లో ఇప్పటి వరకు రూ.4,073 కోట్లకు పెరిగాయి.
ఇష్టారాజ్యంగా క్రెడిట్ కార్డు వాడకంతో ఇబ్బందులు
అందుబాటులో క్రెడిట్ కార్డు ఉందని ఇష్టారాజ్యంగా వాడుతూ ఉండటం, పేమెంట్స్ సరిగ్గా చేయకపోవడం ఆందోళనకరంగా మారుతుందని చెబుతున్నారు. విచక్షణా రహితంగా క్రెడిట్ కార్డు స్పెండింగ్ చేసి.. తర్వాత పేమెంట్స్లో ఫెయిల్ అయినా.. అనివార్య కారణాల వల్ల చెల్లించలేకపోయినా తిప్పలు తప్పవు. క్రెడిట్ కార్డ్ డీఫాల్ట్ అంటే ఏమిటో.. దానికి పరిష్కారం ఏమిటో తెలుసుకుందాం..
క్రెడిట్ కార్డుతో రోజువారీ ఖర్చులు, మెడికల్, పెట్రోల్ బిల్లులకు పే చేయొచ్చు. కానీ, మీ క్రెడిట్ కార్డుకు బ్యాంకు నిర్దేశించిన గడువు లోపు ఆ క్రెడిట్ కార్డు బిల్లు పే చేయాలి. ఒక్కోసారి భారీగా ఖర్చు చేయాల్సి వచ్చినప్పుడు ఒకేసారి చెల్లించలేకపోతే వాయిదాల (ఈఎంఐ) పద్దతి ఎంచుకోవాలి.
అలా కాకుండా అనూహ్య పరిస్థితుల్లో ఉద్యోగం కోల్పోయినా, వ్యాపారంలో నష్టాలు వచ్చినా.. ఇతర ఎమర్జెనీ పరిస్థితుల్లో క్రెడిట్ కార్డు బిల్లు పే చేయడం కష్టతరంగా మారినా.. సకాలంలో పే చేయకుంటే డీఫాల్టర్ గా ముద్ర పడుతుంది. క్రెడిట్ కార్డు బిల్లు నెలల తరబడి చెల్లించకపోవడాన్ని క్రెడిట్ కార్డు పేమెంట్ డీఫాల్ట్ అని అంటారు. గడువు తర్వాత 30 రోజుల్లోపు పే చేయకపోవడం తొలి తప్పిదంగా పరిగణిస్తారు. అలా కాకుండా ఆరు నెలలు మినిమం బిల్లు పే చేయకుంటే సదరు క్రెడిట్ కార్డు డీయాక్టివేట్ కావడంతోపాటు డీఫాల్ట్ జాబితాలోకి చేరుతుంది.
క్రెడిట్ కార్డు బిల్లు రీపేమెంట్ విషయమై బ్యాంకులు నిరంతరం తమ ఖాతాదారులను సంప్రదిస్తాయి.. ఆ తర్వాత కూడా ఆ బిల్లు పే చేయకుంటే ఖాతా క్లోజ్ చేస్తాయి.. ఆ సమాచారం ‘నో పేమెంట్ రిపోర్ట్’ కింద క్రెడిట్ బ్యూరో’లకు చేరవేస్తాయి. దీనివల్ల సంబంధిత క్రెడిట్ కార్డు డీఫాల్టర్ల క్రెడిట్ స్కోర్ మీద నెగెటివ్ ప్రభావం చూపుతుంది. మున్ముందు బ్యాంకులో రుణం తీసుకోవాలన్నా.. కొత్త క్రెడిట్ కార్డు తీసుకోవాలన్నా కష్టమేనని ఆర్థిక నిపుణులు చెబుతున్నారు.
లేట్ పేమెంట్ ఫీజు, అదనపు వడ్డీ, చార్జీలు కలిపి క్రెడిట్ కార్డు బిల్లు బకాయి వసూళ్లకు 38 -42 శాతం వరకూ వడ్డీ వసూలు చేస్తాయి. రుణ పరిమితి తగ్గిపోవడంతోపాటు హై రిస్క్ రుణ గ్రహీతగా మారుతారు. కొన్ని సందర్భాల్లో బ్యాంకులు క్రెడిట్ కార్డు బిల్లు రికవరీ కోసం బ్యాంకులు సివిల్ కేసులు.. మోసపూరితంగా వ్యవహరిస్తే క్రిమినల్ కేసులు కూడా పెట్టొచ్చు.
లోన్ రికవరీ ఏజెన్సీల ద్వారా కొన్ని బ్యాంకులు క్రెడిట్ కార్డుల బిల్లులు వసూలు చేస్తాయి. ఆ రికవరీ సంస్థ ఏజంట్ల దూకుడు, వేధింపులు తట్టుకోవడం కష్టతరంగా మారుతుంది. సమాజంలో అవమానాల పాలవుతారు. ఆ ఏజెంట్ల దూకుడు వల్ల ఆందోళనకు గురవుతారు.
అనివార్య పరిస్థితుల్లో క్రెడిట్ కార్డు బిల్లు వెంటనే చెల్లించలేకపోతే వెంటనే బ్యాంకు శాఖను సంప్రదించి.. తమ పరిస్థితి వివరించాలి. సిబిల్ స్కోర్ మీద ప్రభావం పడకుండా పాక్షికంగా బిల్లులు చెల్లించాలి. తక్కువ వడ్డీ రేటు, లేట్ పేమెంట్ ఫీజు చార్జీలపై మినహాయింపు కోసం అప్పీల్ చేయాలి. వన్ టైం సెటిల్మెంట్ అవకాశం ఉందేమో చెక్ చేసుకోవాలి.
ఇదిలా ఉంటే గతేడాది జూలై ఒకటో తేదీ నుంచి ఆర్బీఐ జారీ చేసిన గైడ్ లైన్స్ ప్రకారం క్రెడిట్ కార్డు జారీ చేసిన బ్యాంకులు.. ఖాతాదారుల బిల్లు చెల్లింపునకు ఏడు రోజుల నోటీస్ పీరియడ్ ఇవ్వాలి. క్రెడిట్ కార్డు ఖాతాదారులను డీఫాల్టర్గా పేర్కొంటూ క్రెడిట్ బ్యూరోలకు సమాచారం ఇస్తున్నట్లు వారికి తెలుపాల్సి ఉంటుంది. బకాయిల చెల్లింపునకు నిర్దిష్ట టైం లిమిట్ పెట్టాలి. ఒకసారి సెటిల్మెంట్, డీఫాల్ట్ చేస్తే సదరు ఆ నివేదికలు సంబంధిత క్రెడిట్ కార్డు ఖాతాదారుల సిబిల్ స్కోర్ను దెబ్బ తీస్తాయి. మీ రికార్డుల్లో ఏడేండ్ల వరకూ కనిపిస్తాయని ఆర్థిక నిపుణులు చెబుతున్నారు.