హైదరాబాద్, జూన్ 27: ప్రైవేట్ లేబుల్ ఇన్స్టంట్ కాఫీ తయారీలో అగ్రగామి సంస్థల్లో ఒకటైన సీసీఎల్ ప్రొడక్ట్స్ నూతన రికార్డును సాధించింది. మార్కెట్ క్యాపిటలైజేషన్ బిలియన్ డాలర్ల సంస్థగా అవతరించింది. ఈ సందర్భంగా కంపెనీ చైర్మన్, ఫౌండర్ చల్లా రాజేంద్ర ప్రసాద్ మాట్లాడుతూ..ప్రైవేట్ లేబుల్ కాఫీ తయారీలో ప్రపంచంలో తొలిస్థానంలో నిలిచినట్టు చెప్పారు.
దేశీయంగా కాఫీకి పెరుగుతున్న డిమాండ్ను దృష్టిలో పెట్టుకొని ఆంధ్రప్రదేశ్లోని తిరుపతి జిల్లాలో రూ.400 కోట్ల పెట్టుబడితో ప్లాంట్కు శంకుస్థాపన చేసినట్లు, వచ్చే ఏడాది అందుబాటులోకి రానున్నదన్నారు. ఈ యూనిట్తో సంస్థ ఉత్పత్తి కెపాసిటీ మరో 16 వేల టన్నులు పెరగనున్నది. ప్రస్తుతం సంస్థ 55 వేల టన్నుల కాఫీని ఉత్పత్తి చేస్తున్నది. భారత్లో సంస్థకు రెండు ఉత్పత్తి కేంద్రాలు ఉండగా..వియత్నాం, స్విట్జర్లాండ్లో ఒక్కో ప్లాంట్ ఉన్నది. గడిచిన ఆర్థిక సంవత్సరంలో రూ.2,070 కోట్ల ఆదాయంపై రూ.230 కోట్ల లాభాన్ని గడించింది.