GST – CBIC | ప్రస్తుతం దేశీయంగా అమల్లో ఉన్న జీఎస్టీ శ్లాబ్ల విధానంపై సెంట్రల్ బోర్డ్ ఆఫ్ ఇండైరెక్ట్ టాక్సెస్ అండ్ కస్టమ్స్ (సీబీఐసీ) చైర్మన్ సంజయ్ కుమార్ అగర్వాల్ సంచలన వ్యాఖ్యలు చేశారు. పరోక్ష పన్నుల శ్లాబ్ వ్యవస్థను కనీస టాక్స్ శ్లాబ్లుగా క్రమబద్దీకరించాల్సి ఉందన్నారు. ప్రస్తుతం జీఎస్టీ అండ్ కస్టమ్స్ విధానంలో అమల్లో ఉన్న క్లాసిఫికేషన్లను కేంద్ర ప్రభుత్వం పూర్తిగా పునర్వ్యవస్థీకరించనున్నదన్నారు. జీఎస్టీలో మూడు శ్లాబ్ల వ్యవస్థ అమల్లోకి తీసుకొచ్చే అవకాశం ఉందని సంజయ్ కుమార్ అగర్వాల్ తెలిపారు.
ప్రస్తుతం జీఎస్టీలో నాలుగు పన్ను శ్లాబ్లు – 5శాతం, 12శాతం,18 శాతం,28 శాతం పన్ను విధానాలు అమల్లో ఉన్నాయి. సామాన్య పౌరుడు వినియోగించే వస్తువులపై గరిష్ట, కనిష్ట పన్ను శ్లాబ్, సంపన్న వర్గాలు వినియోగించే వస్తువులపై హయ్యర్ శ్లాబ్ వర్తింప చేయాలని సంజయ్ కుమార్ అగర్వాల్ తెలిపారు. దీనిపై జీఎస్టీ కౌన్సిల్ తుది నిర్ణయం తీసుకుంటుంది. ప్రస్తుతం పెండింగ్ లో ఉన్న జీఎస్టీ రీఫార్మ్స్ మీద జీఎస్టీ కౌన్సిల్ తుది నిర్ణయం తీసుకోనున్నది. ఇందుకోసం నియమించిన జీఎస్టీ కమిటీకి బీహార్ డిప్యూటీ సీఎం సామ్రాట్ చౌదరి సారధ్యం వహిస్తున్నారు. జీఎస్టీ పన్నుల వ్యవస్థల హేతుబద్ధీకరణపై కొత్తగా ఏర్పాటైన సామ్రాట్ చౌదరి కమిటీ తుది నిర్ణయం తీసుకుంటుందని చెప్పారు.