Apple | ప్రపంచవ్యాప్తంగా టెక్నాలజీ సంస్థలన్నీ తమ ఉత్పత్తుల్లో ఆర్టిఫిషియల్ ఇంటెలిజెన్స్ (ఏఐ) టెక్నాలజీని అందిస్తూ దూసుకెళ్తుంటే ఆపిల్ మాత్రం వెనక బడింది. ఈ నేపథ్యంలో తమ ఉత్పత్తుల్లో చాట్జీపీటీని అనుసంధానిస్తున్నట్లు ప్రకటించింది. ఇందుకోసం చాట్ జీపీటీ మాతృసంస్థ ఓపెన్ ఏఐ తో భాగస్వామ్య ఒప్పందం కుదుర్చుకున్నట్లు ఆపిల్ తెలిపింది.
కాలిఫోర్నియాలోని సిలికాన్ వ్యాలీలోని ఆపిల్ హెడ్ క్వార్టర్స్లో ప్రపంచవ్యాప్త వార్షిక డెవలపర్ల సమావేశం (డబ్ల్యూడబ్ల్యూడీసీ24) లో సంస్థ సీఈఓ టిమ్ కుక్ మాట్లాడుతూ ఐ-ఫోన్లలో వచ్చే కొత్త ఫీచర్లతోపాటు చాట్జీపీటీ సంగతి ప్రస్తావించారు. ఓపెన్ ఏఐ భాగస్వామ్యంతో ఆపిల్ ఉత్పత్తులను తేలిగ్గా నావిగేట్ చేయడానికి ‘ఆపిల్ ఇంటెలిజెన్స్’ ఆవిష్కరించారు. దీంతోపాటు ఆర్టిఫిషియల్ ఇంటెలిజెన్స్ రేసులో పోటీ పడేందుకు ఆపిల్ తన వాయిస్ అసిస్టెంట్ ‘సిరి’కి ఏఐ టెక్నాలజీ జోడించనున్నది.
ముందుగా ఐఓఎస్ 18, ఐప్యాడ్ ఓఎస్ 18, మ్యాక్ ఓఎస్ ల్లో చాట్జీపీటీ సేవలు ప్రారంభం అవుతాయి. అకౌంట్ క్రియేట్ చేయకుండానే చాట్జీపీటీ యాక్సెస్ చేసుకోవచ్చు. అయితే ఐ-ఫోన్లలో చాట్జీపీటీ వాడాలా..? వద్దా.. అన్నది యూజర్లదే తుది నిర్ణయం అని ఆపిల్ పేర్కొంది. ఆపిల్ భాగస్వామ్యంతో ఆ సంస్థ ఉత్పత్తుల్లో చాట్ జీపీటీ సౌకర్యం తేవడం చాలా ఆనందంగా ఉందని చాట్జీపీటీ సృష్టికర్త శామ్ ఆల్ట్మన్ చెప్పారు. అలాగే డేటా సెక్యూరిటీపైనా ఆందోళన చెందాల్సిన అవసరమే లేదన్నారు.