హైదరాబాద్, జనవరి 4: చౌక విమానయాన సంస్థ ఆకాశ ఎయిర్లైన్స్..హైదరాబాద్ నుంచి విమాన సేవలు ఆరంభించబోతున్నది. ఈ నెల 25 నుంచి హైదరాబాద్-బెంగళూరు, హైదరాబాద్-గోవా రూట్లలో రోజువారి విమాన సర్వీసులు నడపనున్నట్లు ప్రకటించింది. ఈ సందర్భంగా కంపెనీ కో-ఫౌండర్, చీఫ్ కమర్షియల్ అధికారి ప్రవీణ్ అయ్యర్ మాట్లాడుతూ..ఐటీ, బయోటెక్నాలజీ, ఫార్మాస్యూటికల్స్ రంగాలకు కీలకంగా మారిన హైదరాబాద్ నుంచి గోవా, బెంగళూరుకు విమాన సర్వీసులు ఆరంభించబోతుండటం సంతోషంగా ఉన్నదని, ఈ రూట్లలో విమాన ప్రయాణికులకు అధిక డిమాండ్ ఉంటుందని ఆశిస్తున్నట్లు పేర్కొన్నారు. ఈ నూతన సర్వీసులతో ఆరు రోజువారి విమాన సర్వీసులకు చేరుకోనున్నాయన్నారు. గతేడాది ఆగస్టులో విమాన సేవలు ప్రారంభించిన సంస్థ చేతిలో ప్రస్తుతం 13 ఎయిర్క్రాఫ్ట్లు ఉన్నాయి.