న్యూఢిల్లీ, ఆగస్టు 9: భోజనంలోకి కావాల్సిన కూరగాయలు, పప్పుదినుసుల ధరలే కాదు.. నోరు చుర్రుమనేలా వేడి వేడి కాఫీ కూడా ఇక నుంచి ప్రియమే. బహుశ కాఫీ తాగుతూ గురువారం ఉదయం ఆర్బీఐ మానిటరీ పాలసీ కమిటీ సభ్యులు కూడా వడ్డీ రేట్లపై నిర్ణయం తీసుకోవడానికి ఆలోచించే పరిస్థితి ఏర్పడింది. ఇప్పటికే జూలై ద్రవ్యోల్బణం 6 శాతాన్ని మించుతుందన్న అంచనాలు నెలకొన్న సమయంలోనే కాఫీ ధరలు భగ్గుమన్నాయి. అంతర్జాతీయంగా కాఫీ గింజలకు తీవ్రమైన కొరత ఏర్పడి స్వల్పకాలంలోనే ధరలు 15-50 శాతం పెరిగాయి. మన దేశంలో కర్నాటకలోని చిక్మగళూర్ నుంచి అధిక ధరలకు కాఫీ బీన్స్ కొనాల్సివస్తున్నదని పూనేలోని కాఫీ ట్రేడింగ్ సంస్థ గాంధీ కాఫీ యజమాని రాజీవ్ గాంధి తెలిపారు. రొబస్టా బీన్స్ ధరలు దాదాపు 50 శాతం పెరగ్గా, అరబికా బీన్స్ ధరలు 15 శాతం ఎగిసాయని వివరించారు. ఈ పెంపుదల వినియోగదారులకు మళ్లించాల్సి వస్తున్నదన్నారు. ఒక్క జూలై నెలలోనే రిటైల్ మార్కెట్లో రొబస్టా, పీబెర్రీ బీన్స్తో బ్లెండ్ చేసే కాఫీ పొడి కేజీకి రూ.580 నుంచి రూ.650కి చేరింది.
తగ్గిన దిగుబడి
కాఫీ గింజల్ని అధికంగా పండించే చిక్మగళూర్ ప్రాంతంలో ప్రతికూల వాతావరణ పరిస్థితులతో పంట దిగుబడి తగ్గింది. పూత సమయంలో అకాల వర్షాలు రావడంతో గత ఏడాదితో పోలిస్తే ఈ ఏడాది 20 శాతం పంట దిగుబడి తగ్గిందని బాలానూర్ ప్లాంటేషన్స్ అండ్ ఇండస్ట్రీస్ మేనేజర్ రోహన్ కురియన్ చెప్పారు. మొక్కల నుంచి బీన్స్ సేకరించే వ్యయం పెరిగిందన్నారు. బ్రెజిల్, వియ త్నాం దేశాల్లో పంట మెరుగ్గా ఉందన్న వార్తలతో ప్రపంచ మార్కెట్లో ఇప్పుడిప్పుడే కాఫీ ధరలు నెమ్మదిస్తున్నాయని, కానీ దేశీయంగా దిగుబడి తగ్గినందున ఇక్కడి మార్కెట్లో గత ఏడాదికంటే ధరల పెరుగుదల రెండంకెల్లోనే ఉంటుందని కాఫీ బోర్డ్ ఇండియా సభ్యుడు, సీసీఎల్ ప్రొడక్ట్స్ ఎండీ చల్లా శ్రీశాంత్ తెలిపారు. ఈ కంపెనీ కాఫీ బ్రాండ్ ‘కాంటినెంటల్’ 200 గ్రాముల జార్ ధర రూ. 280 నుంచి రూ. 360కి పెరిగింది. వచ్చే త్రైమాసికంలో మరో 10 శాతం పెంచే అవకాశం ఉంది.