న్యూఢిల్లీ, జూలై 24: ఈక్విటీ క్యాష్ సెగ్మెంట్లో ప్రతీ 10 మంది వ్యక్తిగత ఇంట్రా-డే ట్రేడర్లకు ఏడుగురు లేదా 71 శాతం నష్టాలకే పరిమితమవుతున్నారు. 2022-23 ఆర్థిక సంవత్సరానికిగాను మార్కెట్ రెగ్యులేటర్ సెబీ చేపట్టిన తాజా అధ్యయనం ఇదే చెప్తున్నది మరి. ఇక 2018-19తో పోల్చితే 2022-23లో ఈక్విటీ క్యాష్ సెగ్మెంట్లో ఇంట్రా-డే ట్రేడింగ్ చేసినవారు 300 శాతానికిపైగా పెరగడం గమనార్హం. అలాగే 30 ఏండ్ల కంటే తక్కువ వయసున్న వ్యక్తులు ఈ తరహా ట్రేడింగ్పై ఎక్కువగా ఆసక్తి చూపిస్తున్నట్టు కూడా బుధవారం సెబీ విడుదల చేసిన అధ్యయనం తేల్చింది. ఈక్విటీ క్యాష్ సెగ్మెంట్ ఇంట్రా-డే ట్రేడింగ్లో ఇండివీడ్యువల్స్ భాగస్వామ్యం, వారిద్వారా జరుగుతున్న లాభనష్టాలను తెలుసుకోవడానికే ఈ అధ్యయనాన్ని నిర్వహించినట్టు సెబీ తెలియజేసింది. 2018-19, 2021-22, 2022-23 ఆర్థిక సంవత్సరాల్లోని తీరుతెన్నులను ఈ సందర్భంగా పరిశీలించింది. కరోనాకు ముందు, ఆ తర్వాత సరళిని కనిపెట్టేందుకే ఈ సంవత్సరాలను ప్రాతిపదికగా తీసుకున్నట్టు వివరించింది. కాగా, ఈక్విటీ క్యాష్ సెగ్మెంట్లో దాదాపు 86 శాతం ఇండివీడ్యువల్ క్లయింట్లున్న టాప్-10 స్టాక్ బ్రోకర్ల క్లయింట్ల ఆధారంగా ఈ అధ్యయనం జరిగింది. వీరిలో ప్రతీ ముగ్గురిలో ఒకరు ఇంట్రా-డే ట్రేడింగ్లో పాల్గొన్నట్టు తేలింది. ఈ క్రమంలోనే 2018-19తో చూస్తే 2022-23లో 30 ఏండ్ల దిగువన ఉన్నవారు 18 శాతం నుంచి 48 శాతానికి పెరిగినట్టు బయటపడింది. ఇదిలావుంటే ఫ్యూచర్స్ అండ్ ఆప్షన్స్ (ఎఫ్అండ్వో) విభాగంలో ట్రేడింగ్ చేస్తున్న మదుపరులూ గణనీయంగా పెరుగుతున్నట్టు సెబీ స్పష్టం చేసింది. 2018-19లో 7.1 లక్షలుగా ఉన్న వ్యక్తిగత ట్రేడర్లు.. 2020-21లో 45.24 లక్షలకు ఎగబాకినట్టు సెబీ అధ్యయనం వెల్లడించింది.
దేశీయ స్టాక్ మార్కెట్లు వరుసగా నాలుగోరోజు నష్టపోయాయి. ప్రస్తుత ఆర్థిక సంవత్సరానికి ప్రవేశపెట్టిన సార్వత్రిక బడ్జెట్లో షార్ట్ టర్మ్ క్యాపిటల్ గెయిన్ ట్యాక్స్, సెక్యూరిటీస్ లావాదేవీ పన్నును పెంచుతూ తీసుకున్న నిర్ణయం మదుపరులకు షాక్ గురిచేసింది. దీంతో ప్రాఫిట్ బుకింగ్కు మొగ్గుచూపడంతో ఒక దశలో 80 వేల దిగువకు పడిపోయిన 30 షేర్ల ఇండెక్స్ సూచీ సెన్సె క్స్ చివరకు 280.16 పాయింట్ల నష్టంతో 80,148.88 వద్ద ముగిసింది. అటు ఎన్ఎస్ఈ నిఫ్టీ సైతం 65.55 పాయింట్లు నష్టపోయి 24,413.50 వద్ద స్థిరపడింది. 19 షేర్ల ఇండెక్స్లు నష్టపోగా, 11 షేర్ల ఇండెక్స్లు లాభాల్లో ముగిశాయి.
రూపాయికి మరిన్ని చిల్లులు పడ్డాయి. డాలర్తో పోలిస్తే రూపాయి మారకం విలువ 2 పైసలు కోల్పోయి చారిత్రక కనిష్ట స్థాయి 83.71కి జారుకున్నది. అంతర్జాతీయ ఫారెక్స్ మార్కెట్లో డాలర్కు అనూహ్యంగా డిమాండ్ నెలకొనడంతో పాటు ఈక్విటీ మార్కెట్లు బలహీనంగా ఉండటం మారకంపై ప్రతికూల ప్రభావం చూపింది. 83.69 వద్ద ప్రారంభమైన డాలర్-రుపీ ఎక్సేంజ్ రేటు ఒక దశలో ఆల్టైం కనిష్ఠ స్థాయి 83.72ని తాకింది. చివరకు రెండు పైసలు నష్టపోయి 83.71 వద్ద ముగిసింది. మరోవైపు మంగళవారంలో కూడా మారకం విలువ 3 పైసలు కోల్పోయిన విషయం తెలిసిందే.