ముంబై, మే 14: విదేశీ సంస్థాగత పెట్టుబడిదారుల్లో ఆందోళన తీవ్రస్థాయికి చేరుకున్నది. సార్వత్రిక ఎన్నికల్లో నరేంద్ర మోదీ సర్కార్కు మెజార్టీ వచ్చే అవకాశాలు లేవని అంచనాలు వెల్లడికావడంతో దేశీయ ఈక్విటీ మార్కెట్ల నుంచి ఎఫ్ఐఐలు భారీ స్థాయిలో తమ పెట్టుబడులను తరలించుకుపోతున్నారు. తాజాగా మంగళవారం రూ.4 వేల కోట్ల పెట్టుబడులను ఉపసంహరించుకున్నారు. ఎక్సేంజ్ల వద్ద ఉన్న సమాచారం ఆధారంగా రూ.9,988. 34 కోట్ల విలువైన షేర్లను కొనుగోలు చేసిన ఎఫ్ఐఐలు.. రూ.14,054 కోట్ల విలువైన షేర్లను విక్రయించారు. నికరంగా రూ. 4,065.66 కోట్ల నిధులను వెనక్కి తీసుకున్నారు. మొత్తంగా ఈ ఏడాది ఎఫ్ఐఐలు రూ.1,17,788 కోట్ల పెట్టుబడులను వెనక్కి తీసుకున్నారు.
ఒకవైపు ఎఫ్ఐఐలు అమ్మకాలకు మొగ్గుచూపితే.. దేశీయ సంస్థాగత పెట్టుబడిదారులు మాత్రం ఈక్విటీ మార్కెట్లలోకి నిధులు కుమ్మరిస్తున్నారు. రూ.11,455 కోట్ల విలువైన షేర్లను కొనుగోలు చేయగా, రూ.7,927 కోట్ల విలువైన షేర్లను విక్రయించారు. నికరంగా వీరు రూ.3,528 కోట్ల పెట్టుబడులు పెట్టినట్లు అయింది. అలాగే డీఐఐలు ఈ ఏడాది ఇప్పటి వరకు రూ.1,79,122 కోట్ల విలువైన షేర్లను కొనుగోళ్లు చేశారు. మరోవైపు, మంగళవారం దేశీయ స్టాక్ మార్కెట్లు భారీగా లాభపడ్డాయి. ఇంట్రాడేలో 500 పాయింట్లకు పైగా లాభపడిన 30 షేర్ల ఇండెక్స్ సూచీ సెన్సెక్స్ 73,104 పాయింట్లకు చేరుకోగా, నిఫ్టీ 114 పాయింట్లు అందుకొని 22,218 పాయింట్లకు చేరుకున్నది.