ముంబై, జూలై 16: దేశీయ స్టాక్ మార్కెట్లు వరుసగా మూడోరోజు లాభాల్లో ముగిశాయి. ఎఫ్ఎంసీజీ, టెలికం, ఐటీ రంగ షేర్ల నుంచి లభించిన మద్దతుతో మరో నూతన శిఖరానికి చేరుకున్నాయి. ఇంట్రాడేలో 233 పాయింట్లు పెరిగిన 30 షేర్ల ఇండెక్స్ సూచీ సెన్సెక్స్ చివరకు 51.69 పాయింట్లు అందుకొని 80,716.55 వద్ద ముగిసింది.
మరో సూచీ నిఫ్టీ సైతం 26.30 పాయింట్లు ఎగబాకి రికార్డు స్థాయి 24,613 వద్ద ముగిసింది. రికార్డు స్థాయికి చేరుకున్న సూచీలకు రిలయన్స్, కొటక్ బ్యాంక్ షేర్లు పతనమవడం భారీ లాభాలను నియంత్రించగలిగాయి. ఈ నెల చివర్లో ఫెడరల్ రిజర్వు వడ్డీరేట్లను తగ్గించే అవకాశాలు ఉన్నట్లు వచ్చిన సంకేతాలతో విదేశీ సంస్థాగత పెట్టుబడిదారులు ఈక్విటీల్లోకి భారీగా నిధులు కుమ్మరించారు. అలాగే బ్లూచిప్ సంస్థల ఆశాజనక ఆర్థిక ఫలితాలు మార్కెట్లకు ఉత్సాహాన్నినింపాయి.
మరోవైపు, మార్కెట్లో హెచ్యూఎల్ 2.7 శాతం పెరిగి టాప్ గెయినర్గా నిలిచింది. దీంతోపాటు భారతీ ఎయిర్టెల్, టెక్ మహీంద్రా, ఇన్ఫోసిస్, మహీంద్రా అండ్ మహీంద్రా, ఐసీఐసీఐ బ్యాంక్, ఐటీసీ, ఏషియన్ పెయింట్స్ లాభాల్లో ముగిశాయి. మరోవైపు, కొటక్ బ్యాంక్, రిలయన్స్ ఇండస్ట్రీస్, ఎన్టీపీసీ, అల్ట్రాటెక్ సిమెంట్, పవర్గ్రిడ్ షేర్లు నష్టల్లోకి జారుకున్నాయి. రంగాలవారీగా చూస్తే రియాల్టీ, ఎఫ్ఎంసీజీ, టెలికమ్యూనికేషన్, టెక్నాలజీ, ఐటీ రంగ షేర్లు రెండు శాతం వరకు లాభపడ్డాయి. ఆర్థిక సేవలు, యుటిలిటీ, బ్యాంకింగ్, క్యాపిటల్ రంగ షేర్లు నష్టాల్లో ముగిశాయి.
మొహర్రం సందర్భంగా బుధవారం స్టాక్ మార్కెట్లు సెలవుపాటించనున్నాయి.