వైసీపీకి వైఎస్ రాజశేఖర్రెడ్డికి సంబంధం లేదని ఏపీ కాంగ్రెస్ అధ్యక్షురాలు వైఎస్ షర్మిల అన్నారు. వైఎస్సార్ కాంగ్రెస్ పార్టీ వ్యక్తి అని తెలిపారు. వైఎస్సార్ నీతి, నిజాయితీ, నిబద్ధత ఉన్న కాంగ్రెస్ పార్టీ వ్యక్తి అని స్పష్టం చేశారు. రాజశేఖర్ రెడ్డి 75వ జయంతి రోజున జగన్ ఏమి చేశారని వైఎస్ షర్మిల ప్రశ్నించారు. ఇడుపులపాయలో వైఎస్సార్ ఘాట్ వద్ద కూడా ఐదు నిముషాలు మాత్రమే ఉన్నారని గుర్తుచేశారు. వందల కోట్లు సిద్ధం సభలకు ఖర్చుపెట్టిన మీరు వైఎస్ఆర్ జయంతికి ఏం చేశారో ప్రజలకు చెప్పాలని నిలదీశారు. ఒక సభ పెట్టి ఆయనకు నివాళి అర్పించలేకపోయారని మండిపడ్డారు. కనీసం వైసీపీ నాయకులు, కార్యకర్తలు ఏం చేశారని ప్రశ్నించారు. ‘‘మీరా రాజశేఖర్ రెడ్డి వారసులు’’ అని మండిపడ్డారు.
వైసీపీ నాయకులు హత్యా రాజకీయాలు, గూండాయిజం చేసి ఉండొచ్చని.. దానిని కాదనట్లేదని చెప్పారు. కానీ దానికి వైఎస్కు ఏంటి సంబంధం? ఆయన విగ్రహాలను ధ్వంసం చేయడం న్యాయమేనా? అని టీడీపీ నేతలను ప్రశ్నించారు. వైఎస్సార్ విగ్రహాలను ధ్వంసం చేస్తే ఊరుకునే ప్రసక్తే లేదని టీడీపీ నేతలు, కార్యకర్తలను వైఎస్ షర్మిల హెచ్చరించారు. మరోసారి ఇలాంటి సంఘటనలు జరిగితే అక్కడే బైఠాయించి ధర్నా చేస్తానని స్పష్టం చేశారు. ఇలాంటి హత్య, కక్ష్య, గుండా రాజకీయాలు చేసిందనే వైసీపీని ఓడించారని తెలిపారు. మళ్లీ అదే పరిస్థితి రాకుండా టీడీపీ నాయకులు చూసుకోవాలని హితవు పలికారు.
అమ్మకు వందనం పథకంలో ఇంట్లో ఉన్న ప్రతి బిడ్డకూ రూ.15వేల చొప్పున ఇస్తామని చంద్రబాబు ఎన్నికల్లో హామీ ఇచ్చారని షర్మిల అన్నారు. కానీ ప్రభుత్వం విడుదల చేసిన జీవోలో మాత్రం ఒక తల్లికి రూ.15వేలు మాత్రమే అని పేర్కొన్నట్లు కథనాలు వస్తున్నాయని.. దీనిపై తక్షణమే స్పష్టత ఇవ్వాలని డిమాండ్ చేశారు.