YS Jagan | ఏపీ ఎన్నికల్లో ఘోర పరాజయం చెందడంతో వైసీపీ అధినేత వైఎస్ జగన్ కీలక నిర్ణయం తీసుకున్నట్లు వార్తలు వినిపిస్తున్నాయి. పులివెందుల ఎమ్మెల్యేగా రాజీనామా చేసి, కడప ఎంపీగా పోటీ చేయాలని భావిస్తున్నట్లుగా సోషల్మీడియాలో పెద్ద ఎత్తున ప్రచారం జరుగుతోంది. ఈ ప్రచారానికి తెలంగాణ సీఎం రేవంత్ రెడ్డి కూడా ఊతమిచ్చారు. నిన్న వైఎస్సార్ జయంతి వేడుకల్లో పాల్గొన్న ఆయన.. కడప ఉప ఎన్నిక జరిగితే షర్మిల తరఫున క్షేత్రస్థాయిలో ప్రచారం చేస్తానంటూ వెల్లడించారు. దీంతో జగన్ ఎంపీగా వెళ్లడం ఫిక్సయిపోయిందని అంతా భావిస్తున్నారు.
పులివెందుల ఎమ్మెల్యే స్థానానికి జగన్ రాజీనామా చేస్తే అక్కడ జగన్కు బదులు తన తల్లి విజయమ్మ లేదా సతీమణి వైఎస్ భారతిలను రంగంలోకి దింపుతారని కూడా వార్తలు వస్తున్నాయి. ఎంపీగా ఉంటే తనపై ఉన్న అక్రమాస్తుల కేసులను మేనేజ్ చేసుకునేందుకు ఈజీగా ఉంటుందనే ఉద్దేశంతో జగన్ ఈ నిర్ణయం తీసుకున్నట్లుగా రాజకీయవర్గాల్లో చర్చ నడుస్తోంది. ఎంపీగా ఢిల్లీకి వెళ్తే కేంద్ర రాజకీయాల్లో కూడా కీలకం కావచ్చని జగన్ అనుకుంటున్నట్లుగా ఒక వాదన ఉంది. అయితే, గత అసెంబ్లీ ఎన్నికల్లో కేవలం 11 స్థానాలకు మాత్రమే పరిమితమైన నేపథ్యంలో విపక్ష హోదా దక్కకపోవడంతో ఐదేళ్లు కూటమిని ఎదుర్కోలేక జగన్ ఈ నిర్ణయానికి వచ్చారని ప్రచారం జరుగుతోంది.
రేవంత్ రెడ్డి వ్యాఖ్యలపై వైసీపీ కడప జిల్లా అధ్యక్షుడు సురేశ్ బాబు మండిపడ్డారు. ఇలాంటి దుష్ప్రచారం చేయడం దారుణమని విమర్శించారు. 2011లో జరిగిన కడప ఉప ఎన్నికల్లో కడప దెబ్బ.. ఢిల్లీ అబ్బా అనేలా ప్రజలు తీర్పు ఇచ్చారని గుర్తుచేశారు. అప్పుడు వైఎస్ జగన్కు వచ్చిన మెజార్టీ చారిత్రాత్మకమని పేర్కొన్నారు. ఇప్పుడు ఏదో కడప ఉప ఎన్నిక అంటూ రూమర్స్ రాగానే తెలంగాణ సీఎం రేవంత్ రెడ్డి స్పందించడం సిగ్గుచేటు అని మండిపడ్డారు.