అమరావతి : జనసేన అధినేత పవన్ కల్యాణ్ (Pawan Kalyan) ఆసక్తికర వ్యాఖ్యలు చేశారు. ఆంధ్రప్రదేశ్లో పోటీ చేసిన అన్ని స్థానాల్లో ఎమ్మెల్యే, ఎంపీగా విజయం సాధించిన జనసేన విజేతలతో బుధవారం మంగళగిరిలో పార్టీ కార్యాలయంలో ప్రత్యేక సమావేశమయ్యారు. ఈ సందర్భంగా నూతన ఎమ్మెల్యే(MLAs) లకు, ఎంపీలకు పలు సూచనలు చేశారు.
తొలిసారి ఎమ్మెల్యేగా గెలుపొందిన తాను ప్రజల కష్టం, రక్తం, స్వేధం నుంచి వచ్చే డబ్బును జీతం (Salary) రూపంలో తీసుకున్నప్పుడల్లా బాధ్యత గుర్తుకు రావాలని తీసుకుంటానని వెల్లడించారు. జీతం ముఖ్యం కాదని, అంతకు మించి నా సొమ్మును ప్రజలకు ఖర్చు చేస్తానని అన్నారు. అంచెలంచెలుగా ప్రజల ఆకాంక్షలను నెరవేర్చేందుకు వీలువైన అసెంబ్లీ బాధ్యతను ప్రజలు అప్పగించారని తెలిపారు.
భారతదేశంలో ఆంధ్రప్రదేశ్ కీలకమైందని , చిన్న నిర్ణయం ఎన్డీయే(NDA) కు ఊత మిచ్చిందని అన్నారు. జనసేన గోరంత దీపమని.. కొండంత వెలుగునిచ్చిందని సంతోషం వ్యక్తం చేశారు. జనసేన అభ్యర్థులకంటే ఎక్కువ మెజార్టీ తనకు రావడం ఆనందాన్ని ఇచ్చిందన్నారు. ఉత్సహాన్ని బాధ్యతగా తీసుకోవాలని సూచించారు. ప్రజలు బలమైన మార్పును కోరుకున్నారని, ప్రజల ఆకాంక్షలను గుండెలో పెట్టుకుని చూసుకోవాలని కోరారు.