Pemmasani Chandrasekhar | వైసీపీ కార్యకర్తలపై జరుగుతున్న దాడులకు నిరసనగా ఢిల్లీలో ధర్నా చేస్తామని వైఎస్ జగన్ చేసిన ప్రకటనపై కేంద్ర మంత్రి పెమ్మసాని చంద్రశేఖర్ విమర్శలు గుప్పించారు. వైఎస్ జగన్ రోడ్లపైకి వస్తే రాష్ట్రానికి నష్టమే అని అన్నారు.
పల్నాడు జిల్లా వినుకొండలో వైసీపీ కార్యకర్త రషీద్ను టీడీపీ కార్యకర్తలే హత్య చేశారని జగన్ చేసిన వ్యాఖ్యలను కేంద్రమంత్రి పెమ్మసాని ఖండించారు. మాచర్ల టీడీపీ ఇన్ఛార్జి చంద్రయ్యది నిజమైన రాజకీయ హత్య అని ఆయన తెలిపారు. వినుకొండలో హత్యకు కారణం ఇద్దరు స్నేహితుల మధ్య ఘర్షణ మాత్రమే అని స్పష్టం చేశారు. వినుకొండలో జరిగిన ఈ హత్యను కావాలని వైసీపీ నాయకులు రాజకీయం చేస్తున్నారని మండిపడ్డారు.
ఏపీ గురించి ఢిల్లీలో మాట్లాడాలంటే అవమానకరంగా ఉందని కేంద్రమంత్రి పెమ్మసాని అన్నారు. ఢిల్లీనే కాదు ఈశాన్య రాష్ట్రాలకు కూడా జగన్ ఖ్యాతి పాకిందని ఎద్దేవా చేశారు. జగన్ గురించి ఎంత తక్కువగా మాట్లాడుకుంటే అంత మంచిదని విమర్శించారు.