తిరుమల : తిరుమల (Tirumala)లో రెండురోజుల క్రితం బాలుడిపై దాడి చేసిన చిరుత బోనులో చిక్కగా దానిని అటవీ శాఖ అధికారులు అడవుల్లో వదిలేశారు. గురువారం రాత్రి అలిపిరి నడక మార్గంలో ఏడో మైలు వద్ద మూడేండ్ల బాలుడిపై చిరుతపులి (Leopard) దాడి చేసి గాయపరిచిన విషయం తెలిసిందే. చిరుతను పట్టుకోవడానికి అధికారులు నడక దారిలో రెండు బోన్లు, 150 ప్రాంతాల్లో సీసీ కెమెరాలను ఏర్పాటు చేయగా శుక్రవారం రాత్రి 10.45 గంటల సమయంలో చిరుతపులి బోనులో చిక్కింది. దానికి ఏడాదిన్నర వయసు ఉంటుందని అధికారులు తెలిపారు.
ఘాట్రోడ్డు(Ghat road)లో తాతతో కలిసి దుకాణంలో తినుబండారాలు కొనుక్కుంటుండగా ఒక్కసారిగా వచ్చిన చిరుత.. బాలుడి మెడ పట్టుకుని ఎత్తుకెళ్లింది. వెంటనే స్పందించిన దుకాణదారుడు, బాలుడి తల్లిదండ్రులు, భద్రతా సిబ్బంది కేకలు పెడుతూ చిరుత వెనుక పరుగులు తీశారు. దీంతో కంట్రోల్ రూం వద్ద బాలుడిని వదిలేసి అడవిలోకి వెళ్లిపోయింది. దీంతో తీవ్రంగా గాయపడిన బాలుడిని పద్మావతి చిన్నపిల్లల దవాఖానకు తరలించారు. ప్రస్తుతం అతని పరిస్థితి బాగానే ఉందని వైద్యులు వెల్లడించారు.
ఘటనా స్థలాన్ని టీటీడీ ఈవో ధర్మారెడ్డితో పాటు అటవీ శాఖ అధికారులు పరిశీలించారు. ఆస్పత్రిలో చికిత్సపొందుతున్న బాలుడిని పరామర్శించి ఆరోగ్యం గురించి వాకబు చేశారు. కాగా బోనులో చిక్కిన చిరుతను శనివారం అటవీ అధికారులు తిరుపతి జిల్లాలోని కల్యాణి డ్యాం(KalyaniDam) వెనుక వైపున ఉన్న అటవీ ప్రాంతంలో వదిలివేశారు( Release).