అమరావతి: విశాఖపట్నంలోని ఆంధ్ర యూనివర్సిటీలో పలు అక్రమాలు, అవినితీ ఆరోపణకు సంబంధించి న్యాయం చేయాలంటూ ఈ రోజు తలపెట్టిన చలో ఏయూ కార్యక్రమం వద్ద ఉద్రిక్త పరిస్థితులు నెలకొన్నాయి. ఎస్సీ, ఎస్టీ , బీసీ, మైనారిటీ పూర్వ విద్యార్థుల సంఘం పిలుపు మేరకు చలో ఏయూ కు పిలుపునివ్వగా మరో వర్గం దీన్ని వ్యతిరేకిస్తు ఆందోళనకు పిలుపునిచ్చింది. దీంతో పోలీసులు ముందుజాగ్రత్త చర్యగా రెండు వర్గాలకు అనుమతి నిరాకరించి ఆంధ్ర వర్సిటీ, పరిసరాల్లో పోలీసులు 144 సెక్షన్ విధించారు.
ఆంధ్రా వర్సిటీ ఇన్, అవుట్ గేట్ల వద్ద పోలీసుల మోహరించి గుర్తింపు కార్డులు ఉన్న విద్యార్థులు, సిబ్బందికే లోపలికి అనుమతిస్తున్నారు. జీవీఎంసీ గాంధీబొమ్మ వద్ద టీఎన్ఎస్ఎఫ్ నాయకుల అరెస్టు చేసి పోలీస్ స్టేషన్కు తరలించారు.
ఈ ఆందోళనలో పాల్గొనేందుకు వస్తున్న ఎమ్మెల్యే వెలగపూడి, మాజీ మంత్రి బండారు, జనసేన నాయకులు పీలా రామకృష్ణ, తాతారావు, గోవిందరెడ్డి, టీడీపీ నాయకులు పుచ్చా విజయకుమార్, మొల్లి పెంటిరాజు సీపీఎం నాయకులు సుబ్బారావు, మాటూరి చిన్నారావు, రాజమహేంద్రవరం మాజీ ఎంపీ హర్షకుమార్, తదితరులను గృహ నిర్బంధం చేశారు.