అమరావతి : ఏపీలో అధికార పార్టీకి చెందిన టీడీపీ ఎమ్మెల్యే(TDP MLA) వినూత్న తరహాలో నిరసన తెలిపి సంచలనం కలిగించారు. వర్షంలో తడుస్తూ రోడ్డుపై నిలబడి అధికారుల తీరుపై ఆగ్రహం వ్యక్తం చేశారు. ఎన్టీఆర్ జిల్లా తిరువూరు(Tiruvoor) నియోజకవర్గం ఎమ్మెల్యే కొలికపుడి శ్రీనివాసరావు (Srinivas rao) శనివారంనాడు తిరువూరు పట్టణంలోని వార్డులో ఆకస్మికంగా పర్యటించారు.
వార్డులో రోడ్డుపై వర్షం నీరు నిలిచి ఉండడంతో వర్షంలో గంటపాటు నిలబడి ఆర్అండ్ బీ(R and B) అధికారులపై నిరసన తెలిపారు. రోడ్ల గుంతలను ఎందుకు పూడ్చడం లేదంటూ అక్కడికి వచ్చిన అధికారులను ప్రశ్నించారు. ఈ సందర్భంగా రోడ్లకు మరమ్మతులు చేపట్టకపోవడం వల్ల స్థానికులు ఎదుర్కొంటున్న ఇబ్బందులను వివరించారు. రోడ్ల మంజూరికి విడుదలైన నిధుల గురించి అడిగి తెలుసుకున్నారు. ఎప్పటిలోగా రోడ్లకు మరమ్మతులు చేస్తారో స్పష్టమైన హామీ ఇవ్వాలని ఆదేశించారు.
ఇదే ఎమ్మెల్యే గత 20 రోజుల క్రితం జిల్లాలోని ఏ. కొండూరు మండలం కంభంపాడులో వైసీపీ ఎంపీపీ కాలసాని నాగలక్ష్మి భర్త కాలసాని చెన్నారావు ఇంటిని కూల్చిన ఘటనపై ఎమ్మెల్యేపై పోలీసులు కేసు నమోదు చేశారు. కేసు నమోదైన నేపథ్యంలో ఎమ్మెల్యే కొలికపూడి శ్రీనివాస రావు సోషల్ మీడియా వేదికగా ఆసక్తికరంగా స్పందించారు.
పదవి శాశ్వతం కాదని.. బాధితులకు న్యాయం చేయలేనపుడు తన లాంటి వారు రాజకీయాల్లో కూడా అవసరం లేదని వ్యాఖ్యానించారు. ఈ వ్యాఖ్యలపై చంద్రబాబు స్పందించి ఎమ్మెల్యేను పిలిపించుకుని మాట్లాడారు. ప్రజాప్రతినిధికి ఓర్పు, సహనం ఉండాలని సూచిస్తూనే మొట్టికాయలు వేశారు.