AP News | వైసీపీ అధినేత వైఎస్ జగన్పై శ్రీకాళహస్తి టీడీపీ ఎమ్మెల్యే బొజ్జల సుధీర్ రెడ్డి విమర్శలు గుప్పించారు. అసెంబ్లీని తప్ప రాష్ట్రంలో అన్నింటినీ జగన్ కుదవ పెట్టారని ఎద్దేవా చేశారు. శుక్రవారం అసెంబ్లీ మీడియా పాయింట్ వద్ద సుధీర్ రెడ్డి మాట్లాడుతూ.. వైసీపీకి చెందిన 11 మంది ఎమ్మెల్యేలు అసెంబ్లీకి రాకుండా ఢిల్లీలో దాక్కున్నారని విమర్శించారు. వచ్చే అసెంబ్లీ సమావేశాలకు అయినా సరే వైసీపీ ఎమ్మెల్యేలు రావాలని కోరారు.
ఏపీలో వైసీపీకి చెందిన 36 మందిని టీడీపీ వాళ్లు చంపారని తప్పుడు ప్రచారం చేస్తున్నారని సుధీర్ రెడ్డి మండిపడ్డారు. జగన్కు దమ్ముంటే ఆ 36 మంది పేర్లను బయటపెట్టాలని సవాలు విసిరారు. మదనపల్లె ఆర్డీవో కార్యాలయంలో ఫైల్స్ దగ్ధమైన ఘటనలో ఎవరినీ వదిలిపెట్టమని హెచ్చరించారు. ఈ ఘటనలో పెద్దిరెడ్డి ఉన్నా సరే శిక్షిస్తామని స్పష్టం చేశారు.
ఏపీలో శాంతి భద్రతలు దిగజారుతున్నాయని.. వైసీపీ నాయకులపై దాడులకు తెగబడుతున్నారని వైఎస్ జగన్ చేసిన వ్యాఖ్యలపై ఏపీ సీఎం చంద్రబాబు కూడా అసెంబ్లీ వేదికగా మండిపడ్డారు. వైసీపీకి ఏ మాత్రం విశ్వసనీయత ఉంటే.. అది ఒక రాజకీయ పార్టీగా ఉండాలని అనుకుంటే 36 మంది పేర్లు పంపించాలని అసెంబ్లీ వేదికగా చంద్రబాబు అడిగారు. 36 రాజకీయ హత్యలు, ఎఫ్ఐఆర్లు ఇవ్వమని డిమాండ్ చేశారు. అబద్ధాల పునాదులపై పార్టీ పెట్టి.. ఆ అబద్ధాలపైనే బతికి, ప్రజలను మోసం చేసిన వాళ్లు ఇలాగే మాట్లాడుతుంటారని చంద్రబాబు మండిపడ్డారు.