కూటమి ప్రభుత్వం ఏర్పడిన తర్వాత రాష్ట్రంలో జరిగిన హత్యలు, దాడులపై పార్లమెంటులో గళమెత్తుతామని వైసీపీ రాజ్యసభ సభ్యుడు ఆళ్ల అయోధ్య రామిరెడ్డి అన్నారు. వైసీపీ నాయకులు, కార్యకర్తలపై జరుగుతున్న దాడులను ఏపీ సీఎం చంద్రబాబు ఆపాలని డిమాండ్ చేశారు.
వినుకొండలో వైసీపీ నేత రషీద్ హత్యపై ఆయోధ్య రామిరెడ్డి దిగ్భ్రాంతి వ్యక్తం చేశారు. రషీద్ను కత్తితో చేతులు నరికి, తీవ్రంగా దాడి చేసి చంపడం దారుణమని అన్నారు. వైసీపీ కార్యకర్తలు, నేతలపై దాడులు చేయకుండా చంద్రబాబే వారి పార్టీ కేడర్ను ఆపాలని డిమాండ్ చేశారు. లేదంటే ఈ నెల 22 నుంచి జరగబోయే అసెంబ్లీ సమావేశాల్లో వైసీపీ ఎమ్మెల్యేలు నిరసనలు తెలుపుతారని చెప్పారు. ఏపీలో జరిగే దాడులను దేశ ప్రజలకు సైతం తెలియజేస్తామని.. ఇందుకోసం ఫొటో గ్యాలరీ కూడా ఏర్పాటు చేస్తామని తెలిపారు.
ఏపీలోని పరిస్థితులను వివరించేందుకు రాష్ట్రపతి ద్రౌపది ముర్ము, ప్రధాని మోదీ అపాయింట్మెంట్ కోరామని అయోధ్య రామిరెడ్డి చెప్పారు. ఏపీలో రాష్ట్రపతి పాలనను విధించాలని కూడా కోరుతామని తెలిపారు. వైసీపీ అధినేత వైఎస్ జగన్ ఆధ్వర్యంలో ఈ నెల 24వ తేదీన ఢిల్లీలో తలపెట్టిన ధర్నాకు అన్ని రాజకీయ పార్టీలను ఆహ్వానిస్తామని చెప్పుకొచ్చారు.