అమరావతి : ప్రపంచవ్యాప్తంగా సంచలనం సృష్టిస్తున్న కల్కి సినిమా టికెట్ ధరల పెంపుపై ఏపీ హైకోర్టు (AP High Court) కీలక వ్యాఖ్యలు చేసింది. ప్రభాష్ హీరోగా నాగ్అశ్విని దర్శకత్వంలో అశ్వినిదత్ నిర్మాతగా కల్కి 2898 ఏడీ (Kalki 2898 AD) చిత్రం ఇటీవల విడుదలై రికార్డులు బద్దలు కొడుతున్న విషయం తెలిసిందే.
ఈ సినిమాకు 10 రోజుల పాటు టికెట్ ధరల పెంపునకు ఏపీ ప్రభుత్వం అనుమతి ఇస్తూ ఆదేశాలు జారీ చేసింది. అయితే ఈ అనుమతి 14 రోజుల పాటు పొడగించడాన్ని సవాలు చేస్తూ ఒకరు ఏపీ హైకోర్టులో పిటిషన్ దాఖలు చేశారు. ఈ ఆదేశాలపై స్టే (Stay) ఇవ్వాలని కోరగా బుధవారం కోర్టు విచారించి స్టేకు నిరాకరించింది.
అయితే కల్కి సినిమానే కాకుండా ప్రత్యేకంగా ఒక్కో సినిమాకి టికెట్ ధరలు పెంచుతూ నిర్ణయం తీసుకునే అధికారం అసలు ప్రభుత్వానికి ఉందా అని అనుమానం వ్యక్తం చేసింది. ఈ మేరకు కౌంటర్లు దాఖలు చేయాలని ప్రతివాదులకు ఆదేశాలు జారీ చేస్తూ తదుపరి విచారణ వచ్చే వారానికి వాయిదా వేసింది.