తిరుమల : తిరుమలకు వచ్చే భక్తులకు అందించే అన్నప్రసాదాల (Annaprasadam) రుచిని పెంచేందుకు నాణ్యమైన బియ్యం సరఫరా చేయాలని టీటీడీ ( TTD) ఈవో జె. శ్యామల రావు రైస్ మిల్లర్లను కోరారు. టీటీడీకి బియ్యం సరఫరా చేస్తున్న రైస్మిల్లర్ల (Rice Millers) తో బుధవారం సమావేశం నిర్వహించారు.
ఈవో మాట్లాడుతూ ఆంధ్రప్రదేశ్(Andhra Pradesh), తెలంగాణ (Telangana) రాష్ట్రాలకు చెందిన రైస్ మిల్లర్స్ అసోసియేషన్ ప్రతినిధులు బియ్యం సేకరణ సమయంలో నాణ్యత ప్రమాణాలను పెంపొందించడంలో దోహదపడే అంశాలను ఇవ్వాలని కోరారు. తద్వారా టెండర్లకు ఆహ్వానించే సమయంలో వాటిని చేర్చవచ్చని అన్నారు. అన్నం రుచిని పెంపొందించేందుకు రైస్ మిల్లర్స్ పలు సూచనలు చేశారు.
ఇందులో ముఖ్యంగా మాతృశ్రీ తరిగొండ వెంగమాంబ అన్నప్రసాదంలో దశాబ్దంన్నర కాలం నాటి వంట పరికరాల స్థానంలో అత్యాధునిక యంత్రాలను ఏర్పాటు చేయాలని సూచించారు. ఈ మేరకు ఈవో స్పందిస్తూ ఇప్పటికే టీటీడీ ఈ విషయమై ఆలోచన చేసిందని, త్వరలో వంటశాలలను ఆధునీకరించనున్నట్లు ఈవో తెలిపారు.
టీటీడీకి రెండు ఎలక్ట్రిక్ స్కూటర్లు విరాళం
కలకత్తాకు చెందిన మోటోవోల్ట్ సీఈవో తుషార్ చౌదరి బుధవారం రూ.2.45 లక్షలు విలువైన రెండు ఎలక్ట్రిక్ స్కూటర్లను టీటీడీకి విరాళంగా అందించారు. ఈ మేరకు శ్రీవారి ఆలయం ఎదుట జేఈవో వీరబ్రహ్మంకు మోటోవోల్ట్ సంస్థ ప్రతినిధులు స్కూటర్ తాళాలు అందించారు.