MPDO Missing | నరసాపురం ఎంపీడీవో వెంకటరమణరావు మిస్సింగ్ మిస్టరీ ఇంకా వీడలేదు. ఆయన అదృశ్యమై ఆరు రోజులు గడుస్తున్నా ఆయన ఆచూకీని కనిపెట్టలేకపోతున్నారు. ఎంపీడీవో వెంకటరమణ మొబైల్ సిగ్నల్ ఆధారంగా ఏలూరు కాల్వలో దూకాడని భావించిన పోలీసులు విజయవాడ నుంచి ఏలూరు వరకు ఉన్న కాలువలో విస్తృతంగా గాలించారు. కానీ మృతదేహం దొరకలేదు. దీంతో అసలు వెంకటరమణరావు కాల్వలో దూకాడా? లేదా? అని పోలీసులు అనుమానం వ్యక్తం చేస్తున్నారు. కాల్వలో దూకితే ఇన్ని రోజులుగా మృతదేహం దొరక్కుండా ఉండదని అంటున్నారు.
ఎంపీడీవో మిస్సింగ్ కేసులో పురోగతి లేకపోవడంతో పోలీసులు తలలు పట్టుకుంటున్నారు. ఎంపీడీవో కాల్ డేటాతో పాటు బ్యాంక్ లావాదేవీలనూ పరిశీలిస్తున్నారు. ఆయన సన్నిహితులు, స్నేహితులను కూడా ఆరా తీస్తున్నారు. కాంట్రాక్టర్ వేధింపులే కాకుండా ఇతర కారణాలేమైనా ఉండొచ్చా అనే కోణంలోనూ దర్యాప్తు చేస్తున్నారు.
నా పుట్టిన రోజే.. నా చావు రోజు
విజయవాడ సమీపంలోని కానూరు మహాదేవపురం కాలనీలో మండవ వెంకట రమణరావు నివాసం ఉంటున్నాడు. పశ్చిమ గోదావరి జిల్లా నరసాపురం ఎంపీడీవోగా పనిచేస్తున్నారు. ఈ నెల 3వ తేదీ నుంచి సెలవు పెట్టిన ఆయన.. ఇటీవల కానూరులోని ఇంటికి వచ్చారు. 15వ తేదీన మచిలీపట్నంలో పని ఉందని చెప్పి ఇంట్లో నుంచి బయటకు వెళ్లిపోయాడు. రాత్రి 10 గంటలకు ఫోన్ చేసి తాను మచిలీపట్నంలో ఉన్నానని.. ఇంటికి రావడానికి ఆలస్యమవుతుందని చెప్పాడు. అర్ధరాత్రి దాటాక కుమారుడికి ఒక మెసేజ్ చేశాడు. నా పుట్టిన రోజైన 16వ తేదీనే నా చావు రోజు కూడా.. అందరూ జాగ్రత్త అని మెసేజ్ చేశాడు.
ప్రసాదరాజు అండదండలతో వేధింపులు
అలాగే డిప్యూటీ సీఎం పవన్ కల్యాణ్కు రాసిన సూసైడ్ నోట్ను కూడా తన సెల్ఫోన్ నుంచి కుటుంబసభ్యులకు పంపించారు. అందులో వైసీపీ ప్రభుత్వ మాజీ చీఫ్ విప్ ప్రసాదరాజుపై తీవ్ర ఆరోపణలు చేశారు. నరసాపురంలో ఫెర్రీ లీజుకు సంబంధించి ప్రసాదరాజు అండదండలతో కాంట్రాక్టర్ రెడ్డప్ప ధవేజీ చేస్తున్న బెదిరింపులు తట్టుకోలేకపోతున్నానని.. తనకు న్యాయం చేయాలని అందులో పేర్కొన్నారు. ఇది చూసి ఆందోళన చెందిన కుటుంబసభ్యులు పెనమలూరు పోలీసులకు ఫిర్యాదు చేశారు. కేసు నమోదు చేసుకున్న పోలీసులు ఎంపీడీవో కోసం గాలింపు చర్యలు చేపట్టారు.