YS Sharmila | ఏపీ పీసీసీ వర్కింగ్ ప్రెసిడెంట్లు సుంకర పద్మశ్రీ, రాకేశ్ రెడ్డిలకు కాంగ్రెస్ అధిష్ఠానం నోటీసులు జారీ చేసింది. పార్లమెంటు ఎన్నికల సమయంలో ఏఐసీసీ వ్యవహారాల ఇన్ఛార్జి మాణికం ఠాగూర్, ఏపీ పీసీసీ అధ్యక్షురాలు వైఎస్ షర్మిల అవినీతికి పాల్పడ్డారంటూ ఆరోపణలు చేసినందుకు గానూ పీసీసీ ఈ నిర్ణయం తీసుకుంది. ఈ మేరకు వారిద్దరికీ పీసీసీ క్రమశిక్షణ సంఘం చైర్మన్ లింగంశెట్టి ఈశ్వరరావు షోకాజ్ నోటీసులు పంపించారు.
పార్టీ వ్యతిరేక కార్యక్రమాలు పాల్పడటమే కాకుండా, తిరుగుబాటు గ్రూపులతో కలిసి మీడియా సమక్షంలో తీవ్రమైన ఆరోపణలు చేశారని, పార్టీ ప్రతిష్ఠకు, నాయకత్వానికి నష్టం కలిగించారని సుంకర పద్మశ్రీ, రాకేశ్ రెడ్డిలకు పంపించిన నోటీసుల్లో పేర్కొన్నారు. వారు చేసిన ఆరోపణలపై వారం రోజుల్లోగా వివరణ ఇవ్వాలని ఆదేధించారు.
రాష్ట్రంలో కాంగ్రెస్ పార్టీ ఓటమికి షర్మిల ఒంటెద్దు పోకడలే కారణమని ఏపీ పీసీసీ వర్కింగ్ ప్రెసిడెంట్స్ సుంకర పద్మశ్రీ, రాకేశ్ రెడ్డి ఇటీవల అధిష్ఠానానికి ఫిర్యాదు చేశారు. షర్మిల నాయకత్వాన్ని వ్యతిరేకిస్తూ ఏఐసీసీ జనరల్ సెక్రటరీ కేసీ వేణుగోపాల్కు లేఖ రాశారు. షర్మిలను ఏపీ పీసీసీ చీఫ్గా నియమించినప్పుడు కాంగ్రెస్ పార్టీని బలోపేతం చేస్తారని చాలా నమ్మకం పెట్టుకున్నామని సుంకర పద్మశ్రీ, రాకేశ్ రెడ్డి ఆ లేఖలో పేర్కొన్నారు. కానీ ఆమె సొంత నిర్ణయాల కారణంగా రాష్ట్రంలో పార్టీకి తీవ్ర నష్టం జరిగిందని ఆరోపించారు. సార్వత్రిక ఎన్నికల్లో సమర్థులైన నేతలకు టికెట్లు ఇవ్వలేదని విమర్శించారు. డబ్బులు ఇచ్చిన వారికే బీఫామ్ కేటాయించారని అన్నారు. సీడబ్ల్యూసీ సభ్యులు, సీనియర్ నాయకులు ఇచ్చిన సూచనలను ఆమె పరిగణలోకి తీసుకోలేదని చెప్పారు. షర్మిల అవగాహన రాహిత్యం కాంగ్రెస్ పార్టీ కేడర్, నాయకులను తీవ్ర నిరాశ నిస్పృహలకు గురిచేసిందని పేర్కొన్నారు.