అమరావతి : ఎన్నో ఆశలతో ఒక్కటైన ఆ జంట పెళ్లయిన రెండురోజులకే ప్రమాదవశాత్తు జరిగిన రోడ్డు ప్రమాదంలో మృతి చెందడం వారి రెండు కుటుంబాల్లో విషాదం నింపింది. శ్రీకాకుళం జిల్లా ఇచ్ఛాపురం పట్టణం బెల్లుపడ కాలనీలో ఉంటున్న గవలపు వేణు అలియాస్ సింహాచలం (26), బ్రహ్మపురానికి చెందిన సుభద్ర అలియాస్ ప్రవల్లిక(23)తో ఈనెల 10న వివాహం జరిగింది.
12న ఇచ్ఛాపురంలో విందు ఏర్పాటు చేశారు. ఈ విందుకు ఇరు కుటుంబాల తరుఫున బంధు, మిత్రులు హాజరై దంపతులను ఆశీర్వదించారు. మరుసటి రోజు ఈ దంపతులు ఒడిస్సాలోని అత్తగారింటికి ద్విచక్రవాహనంపై వెళ్తుండగా గొలంత్రా పోలీస్ స్టేషన్ పరిధిలో ట్రాక్టర్ ఢీ కొట్టింది. దీంతో సుభద్ర అక్కడికక్కడే మృతి చెందగా భర్త సింహాచలానికి తీవ్ర గాయాలయ్యాయి. వెంటనే అతడిని బ్రహ్మపుర ఆస్పత్రికి తరలించగా చికిత్స పొందుతూ మృతి చెందాడని వైద్యులు తెలిపారు.
విజయవాడలో ..
మంగళవారం విజయవాడ గూడవల్లి జాతీయ రహదారిపై జరిగిన రోడ్డు ప్రమాదంలో ఇద్దరు మృతి చెందారు. కారు, ద్విచక్రవాహనం ఢీ కొనగా ఏలూరు జిల్లాకు చెందిన షేక్ రిజ్వాన్, షేక్ రఫీ దుర్మరణం చెందారు.