మృత్యువులా దూసుకొచ్చిన లారీ ఓ కుటుంబాన్ని చిన్నాభిన్నం చేసింది. తన భర్త కోసం ఇద్దరు పిల్లలతో ఎదురుచూస్తున్న ఓ మహిళపై వేగంగా వెళ్లింది. ఈ ప్రమాదంలో లారీ చక్రాల కింద నలిగి తల్లీకూతుళ్లు మరణించగా.. నాలుగేళ్ల కుమారుడు చావుబతుకుల మధ్య ఆస్పత్రిలో కొట్టుమిట్టాడుతున్నాడు. ఈ విషాద ఘటన ఏపీలోని తిరుపతి జిల్లా ఏర్పేడు మండలం ఆమడూరులో చోటు చేసుకుంది.
వివరాల్లోకి వెళ్తే.. ఎస్సీ కాలనీకి చెందిన శారద దంపతులకు గురు కార్తిక్ (4), గురు వైష్ణవి ( 2 ) సంతానం. ఇద్దరు పిల్లలతో శారద శనివారం తన బంధువుల ఇంటికి వెళ్లింది. ఆదివారం సాయంత్రం తిరిగి తమ ఇంటికి బయల్దేరింది. రామానుజపల్లి క్రాస్ రోడ్డు వద్ద దిగిన శారద తన భర్తకు కాల్ చేసింది. భర్త వచ్చేందుకు కాస్త సమయం అవుతుందని పిల్లలతో కలిసి రోడ్డు పక్కన కూర్చుంది. అదే సమయంలో విజయవాడ నుంచి చెన్నైకి వెళ్తున్న ఓ లారీ అతివేగం కారణంగా అదుపు తప్పి వారిపైకి దూసుకొచ్చింది.
ఈ ప్రమాదంలో రెండేళ్ల చిన్నారి వైష్ణవి అక్కడికక్కడే మరణించింది. శారద లారీ చక్రాల మధ్యలో ఇరుక్కుపోయింది. అదే సమయానికి అక్కడికి వచ్చిన భర్త జరిగిన ఘోరం చూసి దిగ్భ్రాంతికి గురయ్యాడు. వెంటనే పోలీసులకు సమాచారం అందించాడు. దగ్గరలోని టోల్ప్లాజా సిబ్బంది ప్రమాదం గురించి తెలిసి అక్కడి వచ్చారు. జాకీల సాయంతో లారీ టైర్లు పైకి లేపి శారదను బయటకు తీశారు. తీవ్రంగా గాయపడిన శారదతో పాటు కార్తిక్ను శ్రీకాళహస్తి ఆస్పత్రికి తరలించారు. అయితే ఆస్పత్రికి తరలిస్తుండగా మార్గమధ్యలోనే శారద కూడా మరణించింది. ఈ ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.