AP News | గంజాయికి బానిసైన ఓ భార్య దారుణానికి ఒడిగట్టింది. తన స్నేహితురాలికి గంజాయి అలవాటు చేసి.. ఆమెపై భర్తతో అత్యాచారం చేయించింది. అదంతా దగ్గరుండి వీడియో తీసి ఆ తర్వాత బ్లాక్మెయిల్కు తెగబడింది. ఏపీలోని తిరుపతిలో ఈ దారుణమైన ఘటన చోటుచేసుకుంది.
వివరాల్లోకి వెళ్తే.. తిరుపతి జిల్లాకు చెందిన సదాశివం ప్రణవకృష్ణ (35) శ్రీ పద్మావతి మహిళా విశ్వవిద్యాలయంలో న్యాయ విద్య చదువుతోంది. ఆమె భర్త కృష్ణ కిశోర్ ఎస్వీయూలో ఎల్ఎల్బీ ఫైనల్ ఇయర్ అభ్యసిస్తున్నాడు. కాలేజీ హాస్టల్లో ఉంటూ చదువుకుంటున్న ప్రణవకృష్ణ తిరుపతి గ్రామీణ మండలం పుదిపట్లలో ఉంటున్న తన భర్త వద్దకు వెళ్లి వస్తూ ఉంటుంది. అయితే ఇద్దరూ గంజాయి వ్యసనానికి అలవాటు పడ్డారు. ఈ క్రమంలోనే తనతో పాటు చదువుకుంటున్న కర్నూలు జిల్లా కల్లూరు మండలానికి చెందిన ఓ యువతి (22)తో ప్రణవకృష్ణకు పరిచయం ఏర్పడింది. ఇద్దరి మధ్య స్నేహం పెరగడంతో సదరు యువతిని ప్రణవకృష్ణ అప్పుడప్పుడు తన ఇంటికి కూడా తీసుకెళ్లేది.
ఇంటికి తీసుకెళ్లిన సమయంలో దంపతులిద్దరూ బిర్యానిలో గంజాయి కలిపి సదరు యువతికి అలవాటు చేశారు. ఆ యువతి మైకంలో ఉన్న సమయంలో తన భర్త కృష్ణ కిశోర్ అత్యాచారం చేశాడు. ఆ తతంగాన్ని ప్రణవకృష్ణ వీడియో తీసింది. అనంతరం ఆ వీడియోలను చూపించి యువతిని బెదిరించారు. ఆమె నుంచి బంగారు ఆభరణాలను తీసుకున్నారు. అంతటితో ఆగకుండా ఆ వీడియోలను యువతి సోదరుడితో పాటు కాబోయే భర్తకు పంపించి డబ్బులు డిమాండ్ చేశారు. భార్యాభర్తల నుంచి వేధింపులు ఎక్కువ కావడంతో సదరు యువతి ఎంఆర్పల్లి పోలీసులను ఆశ్రయించింది. కేసు నమోదు చేసుకున్న పోలీసులు శుక్రవారం నాడు నిందితులిద్దర్నీ అరెస్టు చేశారు. ఈ నేపథ్యంలోనే కృష్ణకిశోర్, ప్రణవకృష్ణలను ఆయా వర్సిటీల నుంచి సస్పెండ్ చేశారు. కాగా, భార్యాభర్తలు ఇద్దరూ గతంలో ఓ యువతిని మోసం చేసి రూ.5లక్షలు కాజేసినట్లు సమాచారం.