YS Jagan | ప్రతిపక్ష హోదా కోసం స్పీకర్కు వైసీపీ అధినేత వైఎస్ జగన్ లేఖ రాయడం సిగ్గు చేటు అని కడప టీడీపీ ఎమ్మెల్యే మాధవిరెడ్డి విమర్శించారు. ప్రతిపక్ష హోదా కావాలని జగన్ కోరడం హేయమైన చర్య అని అన్నారు.
ప్రతిపక్ష హోదాపై వైఎస్ జగన్కు కనీస అవగాహన లేదని ఎమ్మెల్యే మాధవిరెడ్డి విమర్శించారు. మొత్తం సభ్యుల్లో పదో వంతు ఉంటేనే ఆ పార్టీకి ప్రతిపక్ష హోదా ఇస్తారని వివరించారు. ప్రజలకు ముఖం చూపించుకోలేకనే జగన్ కొత్త కుయుక్తులకు తెరలేపారని ఆరోపించారు. స్పీకర్ ఎన్నిక రోజు కూడా వైసీపీ ఎమ్మెల్యేలు అసెంబ్లీకి రాలేదని మండిపడ్డారు. జగన్కు 11 సీట్లు ఇచ్చి ప్రజలు తగిన బుద్ధి చెప్పారని ఎద్దేవా చేశారు. జగన్ పాలనలో ప్రతి ఒక్కరూ ఎంతగానో నష్టపోయారని పేర్కొన్నారు.
తమ పార్టీకి ప్రతిపక్ష హోదా ఇవ్వాలని పేర్కొంటూ వైసీపీ అధినేత వైఎస్ జగన్ మంగళవారం నాడు ఏపీ స్పీకర్ చింతకాయల అయ్యనపాత్రుడికి లేఖ రాశారు. మంత్రుల తర్వాత తనతో ప్రమాణం చేయించడం సంప్రదాయాలకు విరుద్ధమని వైఎస్ జగన్ ఆ లేఖలో పేర్కొన్నారు. ప్రతిపక్ష హోదా ఇవ్వకూడదని.. ముందే నిర్ణయించినట్లు ఉన్నారని అనుమానం వ్యక్తం చేశారు. ప్రతిపక్ష హోదాకు 10 శాతం సీట్లు ఉండాలని ఎక్కడా లేదని తెలిపారు. అటు పార్లమెంటులో గానీ.. ఇటు ఉమ్మడి ఆంధ్రప్రదేశ్లో గానీ ఈ నిబంధనను ఇప్పటిదాకా ఎప్పుడూ పాటించలేదని గుర్తుచేశారు. విపక్షంలో ఎక్కువ సీట్లు ఉన్నవారికే ప్రతిపక్ష హోదా ఇవ్వాలని సూచించారు.
కూటమి ప్రభుత్వం, స్పీకర్ తనపై శత్రుత్వం ప్రదర్శిస్తున్నారని జగన్ వాపోయారు. చచ్చేదాకా కొట్టాలంటూ స్పీకర్ మాట్లాడిన మాటలకు సంబంధించిన వీడియోలు ఇటీవల బయటపడ్డాయని తెలిపారు. ఇలాంటి నేపథ్యంలో అసెంబ్లీలో గొంతు విప్పే పరిస్థితి కనిపించడం లేదన్నారు. ప్రతిపక్ష హోదాతోనే సమస్యలను వినిపించే అవకాశం ఉందని స్పష్టం చేశారు. ఈ అంశాలను స్పీకర్ దృష్టిలో పెట్టుకోవాలని సూచించారు.
తమ పార్టీ కార్యాలయాలే లక్ష్యంగా టీడీపీ విధ్వంసం సృష్టిస్తోందని వైసీపీ ఆరోపించింది. విజయవాడ, విజయనగరం పార్టీ కార్యాలయాల్ని కక్షపూరితంగా ధ్వంసం చేసేందుకు ప్రయత్నిస్తోందని విమర్శించింది. చంద్రబాబు ఇచ్చిన జీవోలతో టీడీపీ కట్టిన పార్టీ కార్యాలయాలను వదిలేసి.. అధికారులతో వైసీపీకి బలవంతంగా కూటమి ప్రభుత్వం నోటీసులు ఇప్పిస్తున్నదని పేర్కొంది.