Pawan Kalyan | దేశంలో మన గెలుపు ఓ కేస్ స్టడీగా మారిందని జనసేన కార్యకర్తలతో ఆ పార్టీ అధినేత, ఏపీ డిప్యూటీ సీఎం పవన్ కల్యాణ్ తెలిపారు. పోటీ చేసిన ప్రతి స్థానంలో గెలిచామని అన్నారు. మనం సాధించిన గెలుపు ఎంతో గొప్పది అని పేర్కొన్నారు. కూటమి విజయానికి మనం తీసుకున్న నిర్ణయమే కీలకమని తెలిపారు. మంగళగిరిలోని పార్టీ ప్రధాన కార్యాలయంలో జనసేన ఎంపీలు, ఎమ్మెల్యేలు, ఎమ్మెల్సీలను పవన్ కల్యాణ్ సత్కరించారు.
ఈ సందర్భంగా పవన్ కల్యాణ్ మాట్లాడుతూ.. గత ప్రభుత్వ హయాంలో స్వేచ్ఛ ఉండేది కాదని విమర్శించారు. గతంలో రోడ్డుపైకి రావాలంటే భయమేసే పరిస్థితి ఉండేదన్నారు. సోషల్మీడియాలో పోస్టు పెట్టాలంటే భయపడాల్సిన దుస్థితి అన్నారు. మన ఇంట్లో వాళ్లపై కూడా దుర్భాషలాడిన పరిస్థితులు చూశామని తెలిపారు. పార్లమెంటు సభ్యుణ్ని బంధించి కొట్టించిన తీరు చూశామని పేర్కొన్నారు. సుదీర్ఘ అనుభవం, సీఎంగా పనిచేసిన చంద్రబాబును కూడా జైల్లో పెట్టించారని ఆవేదన వ్యక్తం చేశారు. అడ్డగోలుగా ఇసుక దోపిడీ, భూకుంభకోణాలు చూశామన్నారు. అందుకే ఐదే కోట్ల మంది ఒక్కటై అరాచక ప్రభుత్వానికి బుద్ధి చెప్పారని తెలిపారు. జనసేన తరఫున పోటీ చేసిన మొత్తం 21 మందిని ప్రజలు గెలిపించారని అన్నారు. పోటీ చేసిన చోటే కాదు.. పోటీ చేయని చోట్ల వీరమహిళలు, జనసైనికులు తీవ్రంగా పోరాడారని వారిని ప్రశంసించారు.
బాధ్యతలు మోసే ప్రతి ఒక్కరికీ తాను అండగా ఉంటానని పవన్ కల్యాణ్ తెలిపారు. జనసైనికులు, వీరమహిళలు తనవైపు బలంగా నిలబడ్డారని.. ఎలాంటి పదవి ఆశించకుండా పోరాడారని పేర్కొన్నారు. ఎంత సాధించినా తగ్గి ఉండటం చాలా అవసరమన్నారు. ఊహించని మెజార్టీతో గెలవడం గొప్ప విషయమని పేర్కొన్నారు. డిప్యూటీ సీఎం అవుతానని అనుకోలేదని పవన్ కల్యాణ్ ఈ సందర్భంగా తెలిపారు. భారీ విజయంతో జనసేన బాధ్యత మరింత పెరిగిందని అన్నారు. ప్రధాని మోదీ మనసులో తనకు స్థానం ఉందని తెలిపారు. అందుకే వెంటనే ప్రధాని మోదీని కలవలేదని చెప్పారు. ఎంత సాధించినా.. తగ్గి ఉండటం మంచి అలవాటు అని అన్నారు. జనసేన ఓటింగ్ శాతం భారీగా పెరిగిందని తెలిపారు.