AP Rains | బంగాళాఖాతంలో అల్పపీడనం కారణంగా ఏపీలోని పలు ప్రాంతాల్లో భారీ వర్షాలు కురుస్తున్నాయి. దీంతో వాగులు, వంకలు పొంగిపొర్లుతున్నాయి. భారీ వర్షాల నేపథ్యంలో ఆంధ్రప్రదేశ్ ప్రభుత్వం అప్రమత్తమైంది.
ఏపీ సీఎం చంద్రబాబు నాయుడు ఆదేశాలతో అధికారులను హోం, విపత్తుల నిర్వహణ శాఖ మంత్రి వంగలపూడి అనిత అప్రమత్తం చేశారు. ప్రజలకు నష్టం వాటిల్లకుండా ముందస్తు చర్యలు తీసుకోవాలని సూచించారు. వరద ప్రభావం ఎక్కువగా ఉన్న ఏలూరు, విశాఖ, అనకాపల్లి జిల్లాల కలెక్టర్లతో మాట్లాడారు ఆయా ప్రాంతాల్లో తీసుకుంటున్న సహాయక చర్యలపై ఆరా తీశారు. ఈ క్రమంలో లోతట్టు ప్రాంతాల ప్రజలు అప్రమత్తంగా ఉండాలని సూచించారు. ప్రతి జిల్లాలో కంట్రోల్రూమ్లు ఏర్పాటు చేయాలని ఆదేశించారు.
భారీ వర్షాల కారణంగా ఏలూరు జిల్లాలోని పలు మన్యం గ్రామాలు జలదిగ్బధంలో చిక్కుకున్నాయి. దీంతో ఏజెన్సీ ప్రాంతాలకు రాకపోకలు నిలిచిపోయాయి. పోలవరం వద్ద భారీగా గోదావరి నీటిమట్టం పెరుగుతుంది. స్పిల్ వే ఎగువ నీటి మట్టం 29 మీటర్లు కాగా.. దిగువ నీటిమట్టం 19.16 మీటర్లుగా ఉంది. రాజమహేంద్రవరం వద్ద కూడా గోదావరి వరద ఉధృతి పెరిగింది. ధవళేశ్వరం కాటన్ బ్యారేజి వద్ద 10.8 అడుగులకు నీటి మట్టం చేరుకుంది. దీంతో 3.50 లక్షల క్యూసెక్కులకు పైగా నీటిని విడుదల చేశారు. ఉమ్మడి విశాఖ జిల్లాల్లో భారీ వర్షాల నేపథ్యంలో విశాఖ జిల్లాలోని అన్ని విద్యాసంస్థలకు కలెక్టర్ సెలవు ప్రకటించారు.