హైదరాబాద్ : ప్రకాశం జిల్లా గుండ్లకమ్మ రిజర్వాయర్ ప్రాజెక్ట్ గేటు కొట్టుకుపోయింది. మల్లవరం కందుల ఓబుల్రెడ్డి (గుండ్లకమ్మ రిజర్వాయర్) ప్రాజెక్టు 3వ గేటు గతంలోనే కొట్టుకుపోయింది. ఇప్పటి వరకు పూర్తిస్థాయిలో మరమ్మతులు జరగలేదని ఆరోపణలుండగా శుక్రవారం రాత్రి రెండో గేటు అడుగు భాగం మిగ్జాం వరద ఉధృతికి కొట్టుకుపోవడంతో ప్రాజెక్టులోని నీరు వృథాగా పోతుంది. అయితే రైతులు ఆందోళన చెందాల్సిన పనిలేదని అధికారులు తెలిపారు.
ప్రాజెక్టు దిగువ ప్రాంతాల రైతులు అప్రమత్తంగా ఉండాలని హెచ్చరించారు. ఇటీవల కురిసిన భారీ వర్షాలతో ప్రాజెక్టులోకి వరద నీరు చేరింది. ప్రాజెక్టులో ప్రస్తుతం 2.5 టీఎంసీల నీటి నిల్వ ఉండగా, నీరు వృథాగా కిందికి పోతుందని రైతులు ఆవేదన వ్యక్తం చేస్తున్నారు.
2022వ సంవత్సరంలో 3వ నంబర్ గేటు కొట్టుకుపోవటంతో పూర్తిస్థాయిలో ఇప్పటి వరకు మరమ్మతులు పూర్తికాలేదు. అధికారుల నిర్లక్ష్యంతో మరోగేటు కొట్టుకు పోయిందని రైతులు ఆగ్రహం వ్యక్తం చేస్తున్నారు.