అమరావతి : ఆంధ్రప్రదేశ్లో మరోసారి అధికారంలోకి రావడానికి వైసీపీ చేస్తున్న కసరత్తులో భాగంగా సిట్టింగ్ ఎమ్మెల్యేలను తప్పిస్తుండడంతో ఆ పార్టీకి చెందిన ఎమ్మెల్యేలు తీవ్ర ఆగ్రహంతో ఉన్నారు. ఇప్పటికే ఇద్దరు ఎంపీలు, మరో నలుగురు ఎమ్మెల్యేలు, ఎమ్మెల్సీలు పార్టీ మారగా మరో ఎమ్మెల్యే పార్టీ మారడానికి సిద్ధంగా ఉన్నారు. ఈసారి నాలుగో జాబితాలో తిరువూరు ఎమ్మెల్యే రక్షణనిధి ( Rakshna Nidhi) పేరు లేకపోవడంతో మనస్థాపానికి గురయ్యారు.
ఈ సందర్భంగా ఆయన శుక్రవారం మీడియా (Media Conference) తో మాట్లాడుతూ రెండుసార్లు ఎమ్మెల్యేగా గెలిచిన తనకు సీటు ఇవ్వకపోవడం వల్ల తన మనస్సు గాయపడిందని అన్నారు. తనకు అవకాశం ఇవ్వడం లేదని 20 రోజుల క్రితమే ఉప్పందిందని, అప్పటి నుంచి పార్టీకి దూరంగా ఉంటున్నానని తెలిపారు. ఒక ఎంపీ ప్లాన్ ప్రకారంతో షరతుల కారణంగా తనకు కాకుండా ఇతరులకు టికెట్ ఇస్తున్నారని ఆవేదన వ్యక్తం చేశారు.
నాయకులు, అనుచరులతో చర్చించి రెండు, మూడు రోజుల్లో భవిష్యత్ ప్రణాళికను ప్రకటిస్తానని వెల్లడించారు. వైసీపీ (YCP) అధిష్టానం ఏది చెప్పినా తూచ తప్పకుండా పనిచేశానని పేర్కొన్నారు. అయితే తాను విపక్షాలను దూషించనందుకే తనను పక్కనపెట్టారేమోనని అనుమానం వ్యక్తం చేశారు.