అమరావతి : ఏపీలో వైఎస్ జగన్పై ఉన్న వ్యతిరేకత కారణంగా ఓట్లు చీలకూడదన్న ఉద్దేశంతో కాంగ్రెస్కు ప్రజలు ఓట్లు వేయలేదని ఏపీ కాంగ్రెస్ కమిటీ అధ్యక్షురాలు వైఎస్ షర్మిల (YS Sharmila) పేర్కొన్నారు. ఢిల్లీలో ఆమె మీడియాతో మాట్లాడారు. రాష్ట్రంలో కాంగ్రెస్ (Congress) అనుకున్న విధంగా పనిచేయలేక పోయిందని అన్నారు. ప్రజలు మార్పును కోరుకున్నారని వెల్లడించారు.
టీడీపీ సపోర్టు (TDP Support) తోనే కేంద్రంలో బీజేపీ మనుగడ ఉందని, ఇప్పటికైనా చంద్రబాబు ప్రత్యేక హోదాపై కేంద్రాన్ని ప్రశ్నించాలని, ఒత్తిడి తేవాలని సూచించారు. వైఎస్ఆర్ కల అయిన పోలవరం నిర్మాణం పూర్తి చేయాలని చెప్పారు. అప్పటి ముఖ్యమంత్రిగా ఉన్న సీఎం చంద్రబాబు 2018నాటికి పోలవరాన్ని పూర్తి చేస్తామని చెప్పి పూర్తి చేయలేదన్నారు. రివర్స్ టెండరింగ్ పేరుతో వైసీపీ ప్రభుత్వం కాలయాపన చేసిందని ఆరోపించారు. పోలవరంపై శ్వేత పత్రం విడుదల చేయాలని డిమాండ్ చేశారు.
ఎన్డీయే కూటమి ఇచ్చిన సూపర్ సిక్స్ హామీలను షరతులు లేకుండా అమలు చేయాలని కోరారు. రాష్ట్రంలో వైఎస్ఆర్ విగ్రహాలు ధ్వంసం చేయడం దారుణమన్నారు. రాష్ర్టంలో, కేంద్రంలో కాంగ్రెస్ పార్టీకి మంచి భవిష్యత్తు ఉంటుందని ఆశాభావం వ్యక్తం చేశారు.