తిరుపతి : అప్పలాయగుంట ప్రసన్న వేంకటేశ్వరస్వామివారి బ్రహ్మోత్సవాల్లో ( Brahmotsavam) మూడోరోజు బుధవారం స్వామివారు శ్రీ యోగ నరసింహస్వామి అలంకారంలో సింహ వాహనం (Simhavahanam) పై భక్తులకు దర్శనమిచ్చారు. ఈ సందర్భంగా మంగళవాయిద్యాలు, భజనలు, కోలాటాల నడుమ ఆలయ మాడ వీధుల్లో కోలాహలంగా వాహనసేవ జరిగింది.
సాయంత్రం 5.30 నుంచి 6:30 గంటల వరకు ఊంజల సేవ, రాత్రి 7 నుంచి 8 గంటల వరకు ముత్యపు పందిరి వాహనంపై స్వామివారు విహరించనున్నారు. వాహనసేవలో ఏఈవో రమేష్, సూపరింటెండెంట్ వాణి, కంకణ భట్టర్ సూర్య కుమార్ ఆచార్యులు, టెంపుల్ ఇన్స్పెక్టర్ శివకుమార్ పాల్గొన్నారు.
శ్రీవారి ఆదాయం రూ. 5.41 కోట్లు
తిరుమలలో భక్తుల రద్దీ కొనసాగుతుంది. స్వామివారి దర్శనం కోసం వచ్చిన భక్తులతో కంపార్టుమెంట్లు నిండిపోయి కృష్ణతేజ గెస్ట్హౌజ్ వరకు క్యూలైన్లో నిలబడ్డారు. టోకెన్లు లేని భక్తులకు 20 గంటల్లో సర్వదర్శనం (Sarvadarsan) కలుగుతుందని అర్చకులు తెలిపారు. నిన్న స్వామివారిని 75,125 మంది భక్తులు దర్శించుకోగా 31,140 మంది తలనీలాలు సమర్పించుకున్నారు. భక్తులు సమర్పించుకున్న కానుకల ద్వారా హుండీ ఆదాయం(Hundi Income) రూ. 5.41 కోట్లు వచ్చిందని టీటీడీ ఆలయ అధికారులు వెల్లడించారు.