AP News | విశాఖ మాజీ ఎంపీ ఎంవీవీ సత్యనారాయణపై క్రిమినల్ కేసు నమోదైంది. హయగ్రీవ భూముల వ్యవహారంలో ఎంవీవీపై ఈ కేసు నమోదు చేశారు. ఎంవీవీతో పాటు ఆడిటర్ గన్నమనేని వెంకటేశ్వరరావు, రియల్టర్ గద్దె బ్రహ్మాజీపైనా వైజాగ్ పోలీసులు కేసు నమోదు చేశారు.
ఎండాడలో సీనియర్ సిటిజన్స్ హౌసింగ్ కోసం 2010లో హయగ్రీవకు 12.51 ఎకరాలను కేటాయించారు. అయితే ఎంవోయూ పేరిట ఖాళీ పత్రాలపై సంతకాలు తీసుకున్నారని మాజీ ఎంపీ ఎంవీవీపై హయగ్రీవ డెవలపర్ చిలుకూరి జగదీశ్ అరిలోవ పోలీస్ స్టేషన్లో ఫిర్యాదు చేశారు. తనను బెదిరించి నకిలీ పత్రాలు సృష్టించారని.. విలువైన భూములను కాజేసేందుకు కుట్రలు పన్నారని ఆరోపించారు. దీంతో జగదీశ్ ఫిర్యాదు మేరకు మాజీ ఎంపీ ఎంవీవీ సత్యనారాయణపై ఈ నెల 22న నాన్ బెయిలబుల్ సెక్షన్ల కింద కేసు నమోదు చేశారు. దీనిపై ఏపీ హైకోర్టులో ఎంవీవీ క్వాష్ పిటిషన్ దాఖలు చేశారు.
ఎంవీవీ సత్యనారాయణకు ఇటీవల జీవీఎంసీ కూడా షాకిచ్చింది. అశీల్మెట్ టైకూన్ కూడలి దగ్గర సీబీసీఎన్సీ స్థలంలో జరుగుతున్న ఎంవీవీ పీక్ వెంచర్ పనులపై స్టాప్ వర్క్ ఆర్డర్ ఇచ్చింది. విశాఖ నగర నడిబొడ్డున వందల కోట్ల రూపాయల విలువ చేసే 4.5 ఎకరాల స్థలంలో ప్రతిష్టాత్మకంగా నిర్మాణాలు చేపట్టిన సంగతి తెలిసిందే. అయితే ఈ స్థలంలో ఉన్న రాళ్లను తొలగించేందుకు నిర్మాణ సంస్థ పేలుడు పదార్థాలను వినియోగిస్తుంది. దీనివల్ల సమీప భవనాల పునాదులు దెబ్బతింటున్నాయని స్థానికులు జీవీఎంసీకి ఫిర్యాదు చేశారు. ఈ క్రమంలోనే జీవీఎంసీ స్టాప్ వర్క్ ఆర్డర్ జారీ చేసింది. తదుపరి ఉత్తర్వులు ఇచ్చే వరకు పనులను నిలిపివేయాలని ఆదేశించింది.