CPI Ramakrishna | ఏపీలో శాంతిభద్రతలు క్షీణిస్తున్నాయని సీపీఐ రాష్ట్ర కార్యదర్శి రామకృష్ణ ఆవేదన వ్యక్తం చేశారు. కూటమి ప్రభుత్వం అధికారంలోకి వచ్చి చంద్రబాబు లాంటి వ్యక్తి సీఎంగా ఉన్న రాష్ట్రంలో శాంతి భద్రతలపై ఆందోళన చెందాల్సిన పరిస్థితి ఉందని అన్నారు. శాంతి భద్రతలపై ముఖ్యమంత్రి దృష్టి సారించాలని సూచించారు.
చిత్తూరు జిల్లా పుంగనూరులో వైసీపీ ఎంపీ మిథున్ రెడ్డి ఉన్న ఇంటిపై దాడి చేయడం సరైన పద్ధతి కాదని సీపీఐ రాష్ట్ర కార్యదర్శి రామకృష్ణ హితవు పలికారు. గతంలో వైసీపీ ఇదే తరహా దాడులకు పాల్పడిందని అన్నారు. గతంలో వైసీపీ చేసిన తప్పిదాలనే ఇప్పుడు టీడీపీ చేస్తోందని విమర్శించారు. ఒక ఎంపీనే ఊర్లోకి రానివ్వమంటూ ఆయనపైనే కేసులు పెట్టడాన్ని ఖండిస్తున్నామన్నారు. సీఎం చంద్రబాబు వీటిని సరిదిద్దాలని సూచించారు.
భారీ వర్షాల కారణంగా రాష్ట్రంలోని ప్రజలు ఇబ్బందులు పడుతున్నారని రామకృష్ణ అన్నారు. పంట నష్టం జరిగిన ప్రాంతాల్లో పర్యటించి ప్రభుత్వం దృష్టికి తీసుకెళ్తామని చెప్పారు. నష్టపోయిన రైతన్నలకు కేంద్ర, రాష్ట్ర ప్రభుత్వాలు సాయం అందించాలని కోరారు. ఎన్నికలకు ముందు ఇచ్చిన హామీ మేరకు రైతు భరోసా నిధులను వెంటనే అందించాలని డిమాండ్ చేశారు. రాష్ట్రం బాగుపడాలంటే ప్రత్యేక హోదా ఇవ్వాలని అన్నారు. విభజన హామీలను కేంద్ర ప్రభుత్వం వీలైనంత తొందరగా అమలు చేయాలని కోరారు. విశాఖ కేంద్రంగా రైల్వే జోన్ పనులు ప్రారంభించాలని డిమాండ్ చేశారు.