AP News | ఆంధ్రప్రదేశ్ రాష్ట్రం నంద్యాల జిల్లా ఎస్పీ రఘువీర్ రెడ్డిపై చర్యలు తీసుకోవాలని కేంద్ర ఎన్నికల సంఘం ఆదేశాలు జారీ చేసింది. ఎన్నికల కోడ్ అమలు చేయడంలో విఫలమైన ఎస్పీ రఘువీర్ రెడ్డిపై చార్జిషీట్ దాఖలు చేయాలని పేర్కొంది. ఎస్పీతోపాటు ఎస్డీపీఓ రవీంద్రనాథ్ రెడ్డి, సీఐ రాజారెడ్డి మీదా శాఖాపరమైన విచారణ చేయాలని రాష్ట్ర డీజీపీకి ఉత్తర్వులు జారీ చేసింది.
సదరు అధికారులపై తీసుకున్న చర్యల వివరాలను ఆదివారం రాత్రి ఏడు గంటల్లోగా తెలుపాలని ఈసీ స్పష్టం చేసింది. నంద్యాలలో సినీ నటుడు అల్లు అర్జున్ పర్యటనకు ఎటువంటి అనుమతి తీసుకోలేదని ఈసీ గుర్తు చేసింది. ఆయన్ను చూడటానికి అభిమానులు భారీగా గుమికూడారని, 144 సెక్షన్ అమలులో ఉన్నా ప్రజలను నియంత్రించడంలో పోలీసులు విఫలం అయ్యారని ఈసీ ఆగ్రహం వ్యక్తం చేసింది.