అమరావతి : ఆంధ్ర ప్రదేశ్ రాజధాని అమరావతి, జీవనాడి పోలవరం ప్రాజెక్టుల పూర్తి కోసం సంపూర్ణ సహకారం అందిస్తామని ప్రకటించిన కేంద్ర ప్రభుత్వానికి (Union Government) ఏపీ మంత్రి నారా లోకేష్ ట్వీట్ (Nara Lokesh Tweet) ద్వారా కేంద్రానికి ధన్యవాదాలు తెలిపారు. 2024-25 కేంద్ర బడ్జెట్లో (Budget) రాజధాని అమరావతి(Amaravati) కి రూ.15 వేల కోట్లు కేటాయించి ఆంధ్రప్రదేశ్ (Andhra Pradesh) పునర్నిర్మాణానికి కట్టుబడిన ఎన్డీఏ ప్రభుత్వానికి రాష్ట్ర ప్రజల తరఫున కృతజ్ఞతలు తెలియజేస్తున్నామని ఆయన ప్రకటించారు.
మంగళవారం కేంద్ర ఆర్థిక మంత్రి ప్రవేశపెట్టిన బడ్జెట్లో ఏపీకి వరాల జల్లు కురిపించారు. అవసరాన్ని బట్టి భవిష్యత్తులో మరిన్న అదనపు నిధులను అమరావతికి కేటాయిస్తామని ఆమె వెల్లడించారు. విభజన చట్టానికి అనుగునంగా పోలవరం సత్వర నిర్మాణానికి సంపూర్ణ సాయం కూడా అందిస్తామని ఆమె హామీ ఇచ్చారు. ఏపీలో వెనుకబడ్డ ప్రాంతాల అభివృద్ధి ప్రత్యేక ప్యాకేజీ ఇవ్వనున్నట్లు ప్రకటించారు.
రాయలసీమ, ప్రకాశం, ఉత్తరాంధ్ర జిల్లాలకు ప్రత్యేక ప్యాకేజీ కింద నిధులు మంజూరు చేస్తామని ఆమె తెలిపారు. హైదరాబాద్- బెంగళూరు పారిశ్రామిక కారిడార్, విశాఖ-చెన్నై పారిశ్రామిక కారిడార్లోని నోడ్లకు ప్రత్యేక సహాయం చేస్తామని నిర్మలాసీతారామన్ ప్రకటించారు. కొప్పర్తి, ఓర్వకల్లు పారిశ్రామిక కేంద్రాలకు నీళ్లు, విద్యుత్, రోడ్లు, హైవేల అభివృద్ధికి నిధులు కేటాయిస్తామన్నారు.