తిరుపతి : తిరుపతి (Tirupati) పట్టణంలో దారుణం జరిగింది. తనకు ఇష్టం లేని పెళ్లి చేశారని అన్న భార్య, ఇద్దరు కుమార్తెలను హత్యచేసి (Murder) మరిది ఆత్మహత్యకు(Suicide) పాల్పడిన విషాద ఘటన పట్టణంలోని పద్మావతి నగర్లో చోటు చేసుకుంది. నెల్లూరు(Nellore) కు చెందిన గుడిమెట్ల తిరిపిదాస్ అనే వ్యక్తి రెండేళ్ల కిందట తిరుపతికి వచ్చి పద్మావతి నగర్లో భార్య సునీత, ఇద్దరు పిల్లలు దేవిశ్రీ, నీరజ తో కలిసి నివాసం ఉంటున్నాడు.
ప్రైవేట్ ఉద్యోగం చేసే తిరిపిదాస్కు మోహన్ అనే తమ్ముడు సాఫ్ట్వేర్ ఉద్యోగం చేస్తున్నాడు. అతడికి 2019లో అన్నావదినలు వివాహం జరిపించారు. వివాదాల నేపథ్యంలో 2021లో మోహన్ను విడిచి భార్య పుట్టింటికి వెళ్లిపోయింది. దీంతో తనకు ఇష్టం లేని పెళ్లి చేశావంటూ తరుచూ అన్నతో గొడవ పడ్డ మోహన్ నిన్న రాత్రి వదినను, ఇద్దరు పిల్లలను గొంతుకోసం చంపి ఫ్యాన్కు ఉరివేసుకుని ఆత్మహత్య చేసుకున్నాడు.
ఇంటికి వచ్చి చూసిన అన్న తిరిపిదాస్ లోపలి దృశ్యాలను చూసి పోలీసులకు సమాచారం అందించాడు. దీంతో స్థానిక పోలీసులు, ఎస్పీ సుబ్బరాయుడు, డీఎస్పీ రవిమనోహరాచారి ఘటనా స్థలానికి చేరుకుని విచారణ చేపట్టారు. పోలీసులు కేసు నమోదు చేసుకుని దర్యాప్తు చేస్తున్నారని ఎస్పీ వెల్లడించారు.