YS Sharmila | పార్లమెంటు ఎన్నికల్లో ఓటమిపై కాంగ్రెస్ పార్టీ హైకమాండ్ పోస్ట్మార్టం మొదలుపెట్టింది. అధికారానికి దగ్గరగా వచ్చి ఓడిపోవడానికి గల కారణాలను విశ్లేషించే పనిలో పడింది. ఇలాంటి సమయంలో ఏపీ పీసీసీ చీఫ్ షర్మిలకు రాష్ట్ర కాంగ్రెస్ నేతలు షాకిచ్చారు. రాష్ట్రంలో కాంగ్రెస్ పార్టీ ఓటమికి షర్మిల ఒంటెద్దు పోకడలే కారణమని అధిష్ఠానానికి ఫిర్యాదు చేశారు. షర్మిల నాయకత్వంపై కేసీ వేణుగోపాల్కు ఏపీసీసీ వర్కింగ్ ప్రెసిడెంట్స్ సుంకర పద్మశ్రీ, రాకేశ్ రెడ్డి ఫిర్యాదు చేశారు.
షర్మిలను ఏపీ పీసీసీ చీఫ్గా నియమించినప్పుడు కాంగ్రెస్ పార్టీని బలోపేతం చేస్తారని చాలా నమ్మకం పెట్టుకున్నామని సుంకర పద్మశ్రీ, రాకేశ్ రెడ్డి అన్నారు. కానీ ఆమె సొంత నిర్ణయాల కారణంగా రాష్ట్రంలో పార్టీకి తీవ్ర నష్టం జరిగిందని ఆరోపించారు. సార్వత్రిక ఎన్నికల్లో సమర్థులైన నేతలకు టికెట్లు ఇవ్వలేదని విమర్శించారు. డబ్బులు ఇచ్చిన వారికే బీఫామ్ కేటాయించారని అన్నారు. సీడబ్ల్యూసీ సభ్యులు, సీనియర్ నాయకులు ఇచ్చిన సూచనలను ఆమె పరిగణలోకి తీసుకోలేదని చెప్పారు. షర్మిల అవగాహన రాహిత్యం కాంగ్రెస్ పార్టీ కేడర్, నాయకులను తీవ్ర నిరాశ నిస్పృహలకు గురిచేసిందని పేర్కొన్నారు.