Vangalapudi Anitha | మాజీ సీఎం వైఎస్ జగన్పై ఏపీ హోంమంత్రి వంగలపూడి అనిత మండిపడ్డారు. కూటమి ప్రభుత్వం అధికారంలోకి రావడాన్ని జగన్ జీర్ణించుకోలేకపోతున్నారని విమర్శించారు. అక్కసుతోనే జగన్ డైవర్షన్ పాలిటిక్స్ చేస్తున్నారని అన్నారు. వినుకొండలో జరిగిన వ్యక్తిగత హత్యపై జగన్ శవ రాజకీయాలు చేస్తున్నారని ఆగ్రహం వ్యక్తం చేశారు. పరామర్శకు వెళ్లి బాధితులకు భరోసా ఇవ్వకుండా ప్రభుత్వంపై బురద జల్లుతున్నారని అన్నారు.
కూటమి ప్రభుత్వంపై జగన్ అసత్య ప్రచారాలు చేస్తున్నారని వంగలపూడి అనిత ఆగ్రహం వ్యక్తం చేశారు.
కూటమి ప్రభుత్వం ఏర్పడిన తర్వాత 45 రోజుల్లో 36 రాజకీయ హత్యలు జరిగాయని జగన్ ఆరోపిస్తున్నారని తెలిపారు. హోంమంత్రిగా దీనిపై తనకు పూర్తి సమాచారం ఇవ్వాలని జగన్ను అడిగారు. ఒకవేళ సమాచారం ఇవ్వకపోతే ఆయనపై ఎందుకు చర్యలు తీసుకోకూడదని ప్రశ్నించారు. కూటమి ప్రభుత్వం అధికారంలోకి వచ్చినప్పటి నుంచి నాలుగు రాజకీయ హత్యలు మాత్రమే జరిగాయని, వీటిలో ముగ్గురు టీడీపీ కార్యకర్తలే మరణించారని స్పష్టం చేశారు.
ప్రభుత్వంపై బురద జల్లడానికే ఇష్టారీతిగా ఆరోపణలు చేస్తున్నారని వంగలపూడి అనిత మండిపడ్డారు. ప్రభుత్వంపై టార్గెట్గా ఎవరు అసత్య ప్రచారాలు చేసినా చర్యలు తీసుకుంటామని హెచ్చరించారు. శాంతిభద్రతలపై అసెంబ్లీలో చర్చించే దమ్ముందా అని జగన్ను ప్రశ్నించారు.