Vangalapudi Anitha | ఏపీలో ఇప్పటికీ టీడీపీ కార్యకర్తలపై దాడులు కొనసాగుతున్నాయని హోంమంత్రి వంగలపూడి అనిత అన్నారు. నిజానికి తమ పార్టీ కార్యకర్తలపైనే దాడులు చేస్తూ ఢిల్లీకి వెళ్లి దీక్షలు చేస్తున్నారని మండిపడ్డారు. ఏపీ అసెంబ్లీ సమావేశాల్లో భాగంగా గురువారం నిర్వహించిన ప్రశ్నోత్తరాల సమయంలో వంగలపూడి అనిత మాట్లాడారు. వైసీపీ సానుభూతిపరులపై దాడులు జరుగుతున్న విషయం వాస్తవమేనా? అని ప్రశ్న వేసి వైసీపీ ఎమ్మెల్యేలు సభకు రాలేదని ఎద్దేవా చేశారు.
ఎన్డీయే కూటమి ప్రభుత్వం అధికారంలోకి వచ్చిన తర్వాత నాలుగు రాజకీయ హత్యలు జరిగాయని.. అందులో ముగ్గురు టీడీపీకి చెందినవారే ఉన్నారని వంగలపూడి అనిత స్పష్టం చేశారు. వాటికి సంబంధించి కేసు నంబర్లతో సహా వెల్లడించామని అన్నారు. కూటమి అధికారంలోకి వచ్చిన తర్వాత 36 రాజకీయ హత్యలు జరిగాయని వైఎస్ జగన్ ఆరోపిస్తున్నారని.. ఆ పేర్లు అడిగితే మాత్రం మాట్లాడటం లేదని విమర్శించారు. అసెంబ్లీకి వచ్చి ఆ 36 మంది పేర్లు చెప్పే దమ్ము జగన్కు లేదా అని ప్రశ్నించారు. చనిపోయిన వాళ్ల పేర్లు చెప్పకుండా ఢిల్లీ ఎందుకు వెళ్లారని ఆమె నిలదీశారు.
జగన్ ఆరోపిస్తున్నట్లు టీడీపీ దాడుల్లో చనిపోయిన 36 మంది వివరాలతో సభకు రావాలని హోంమంత్రి వంగలపూడి అనిత డిమాండ్ చేశారు. ఆ వివరాల ఆధారంగా చర్యలు తీసుకుంటామని హామీ ఇచ్చారు. అయితే ఆ వివరాలు తప్పు అని తేలితే ప్రభుత్వం తీసుకునే చర్యలకు బాధ్యులు కావాల్సి ఉంటుందని హెచ్చరించారు. నారా లోకేశ్ రెడ్బుక్ గురించి వైసీపీ కార్యకర్తలే పట్టించుకోవడం లేదని.. మరి జగన్కు ఎందుకు నిద్ర పట్టడం లేదో అని ఎద్దేవా చేశారు.